Куни кеча ижтимоий тармоқда автокредит учун талаб кучайтирилгани, тижорат банклари кредит портфелининг 25 фоизидан ошмаслиги кераклиги ҳақида хабарлар тарқалганди.
Марказий банк 12 сентябрь куни банкларнинг кредит портфелида концентрация таваккалчилиги ҳолати юзасидан қарор қабул қилган.
Бунда банклар “Банклар ва банк фаолияти тўғрисида”ги қонунга мувофиқ, активлари бўйича йўқотишларга оид таваккалчиликни камайтириш мақсадида ўз активларининг диверсификация қилинишини таъминлаши кераклиги белгиланди. Бу ҳақда Марказий банк Матбуот хизматининг хабар берди.
Марказий банк томонидан банклар фаолиятига таъсир кўрсатувчи таваккалчиликлар аниқланганда, уларнинг барқарорлигини сезиларли даражада ёмонлаштирувчи таваккалчиликларга сабаб бўладиган айрим молиявий операцияларни амалга оширишга белгиланган чекловларга риоя этиш талабларини кучайтириши таъкидланди.
“Сўнгги йилларда банклар томонидан жисмоний шахсларга ажратилган кредитлар таркибида автокредитлар улушининг кескин ортиши концентрация таваккалилигини вужудга келтириб, мазкур йўналишда юзага келиши мумкин бўлган молиявий йўқотишларнинг банклар барқарорлигига таъсири хатарларини ошишига сабаб бўлмоқда. Шу сабаб тижорат банкларига кредит портфелининг диверсификация қилинишини таъминлаш юзасидан тегишли кўрсатмалар берилди”, - дейилади хабарда.
Қайд этилишича, Марказий банкнинг ушбу кўрсатмаси банклар томонидан автокредитлар ажратилишини тақиқламайди ҳамда таклиф этилаётган фоиз ставкалари ошишига таъсир кўрсатмайди.
