Kuni kecha ijtimoiy tarmoqda avtokredit uchun talab kuchaytirilgani, tijorat banklari kredit portfelining 25 foizidan oshmasligi kerakligi haqida xabarlar tarqalgandi.
Markaziy bank 12 sentyabr kuni banklarning kredit portfelida konsentrasiya tavakkalchiligi holati yuzasidan qaror qabul qilgan.
Bunda banklar “Banklar va bank faoliyati to`g`risida”gi qonunga muvofiq, aktivlari bo`yicha yo`qotishlarga oid tavakkalchilikni kamaytirish maqsadida o`z aktivlarining diversifikasiya qilinishini ta`minlashi kerakligi belgilandi. Bu haqda Markaziy bank Matbuot xizmatining xabar berdi.
Markaziy bank tomonidan banklar faoliyatiga ta`sir ko`rsatuvchi tavakkalchiliklar aniqlanganda, ularning barqarorligini sezilarli darajada yomonlashtiruvchi tavakkalchiliklarga sabab bo`ladigan ayrim moliyaviy operasiyalarni amalga oshirishga belgilangan cheklovlarga rioya etish talablarini kuchaytirishi ta`kidlandi.
“So`nggi yillarda banklar tomonidan jismoniy shaxslarga ajratilgan kreditlar tarkibida avtokreditlar ulushining keskin ortishi konsentrasiya tavakkaliligini vujudga keltirib, mazkur yo`nalishda yuzaga kelishi mumkin bo`lgan moliyaviy yo`qotishlarning banklar barqarorligiga ta`siri xatarlarini oshishiga sabab bo`lmoqda. Shu sabab tijorat banklariga kredit portfelining diversifikasiya qilinishini ta`minlash yuzasidan tegishli ko`rsatmalar berildi”, - deyiladi xabarda.
Qayd etilishicha, Markaziy bankning ushbu ko`rsatmasi banklar tomonidan avtokreditlar ajratilishini taqiqlamaydi hamda taklif etilayotgan foiz stavkalari oshishiga ta`sir ko`rsatmaydi.
