Ижтимоий тармоқларда Фарғонада профилактика инспектори йўлнинг четида кома ҳолатида топилгани бўйичахабарлар тарқалди. Ҳолатга вилоят ИИБ расмий муносабат билдирди.
Маълум бўлишича, Тошлоқ тумани ИИБ профилактика инспектори катта лейтенант А.У. жорий йилнинг 5 декабрида тунги хизматдан чиқиб, туман ИИБда ўтказилган эрталабки йўриқномага келмаган. Бу вақт давомида у билан боғланишнинг имкони бўлмаган.
Ўтказилган суриштирув ишлари давомида катта лейтенант А.У. яшаш хонадонидан тахминан 3 км узоқликдаги Бесаранг қишлоғи ҳудудидан оқиб ўтувчи "Катта Фарғона" канали ёқасида, ўзининг “Спарк” русумли машинасида топилган.
Аммо ходим топилган вақтида қўрқинчли ҳолатда бўлган. Яъни у ўзига бириктирилган ПМ табел қуроли билан бошидан жароҳатланган, кома ҳолатида топилган ва зудлик билан тиббий муассасага жойлаштирилган.
Аниқланишича, у, ижтимоий тармоқларнинг "1хбет" иловасидан фойдаланиб, жорий йилнинг август ойида 45 млн сўм ютқазганлиги учун, қарздорлик муаммоси ҳал этилиб, интизомий тартибда жазоланган ҳамда вилоят ИИБ қошидаги Интизомий кенгашнинг назоратида бўлган.
Ҳозирда ҳолат вилоят прокуратура органлари томонидан ўрганилмоқда.
Маълумот учун: Республика кесимида қимор ўйинлари бўйича маъмурий ҳуқуқбузарликлар сони 2019-йилда 1 минг 454 та ташкил этган бўлса, 2022-йилнинг 6 ойида 2 минг 325 тага етган.
Ушбу ўйинларни ташкил этиш билан боғлиқ жиноятлар 2019 йилда 55 та бўлса, 2022 йилнинг 6 ойида 90 тадан ошган. Шу сабабли айнан мана шундай интернетда қимор ва таваккалчиликка асосланган ўйинлар учун жавобгарлик белгиланмоқда.
