Россия Ташқи ишлар вазирлиги томонидан эълон қилинган Украинанинг "ифлос бомба" тайёрлаганлиги ҳақидаги "далил" 2010 йилда Словенияда олинган сурат бўлиб чиқди.
Украинанинг "ифлос бомба" яратиш жараёнини акс эттирувчи фотосурат - бу 24 октябрь куни Россия ТИВ томонидан Россия Мудофаа вазирлигига таяниб, твиттерда эълон қилинган - маълум бўлишича, сурат 2010 йилда Словенияда олинган. Бу ҳақдаги твит Словения ҳукумати томонидан 25 октябрь куни эълон қилинди.
Россия ТИВ хабаридаги суратда радиоактив хавф белгиси билан белгиланган мазмуни ноаниқ бўлган пакетлар кўрсатилган. Фотосурат тагида: “Ишлатилган материаллар: уран-235, плутоний-239” деб ёзилган.
Словения ҳукумати 2010 йилда Словения Ядро чиқиндилари агентлиги томонидан профессионал мақсадларда олинган ушбу фотосуратда “радиация манбалари мавжуд, аммо фотосурат остидаги жадвалда кўрсатилган радиоактив материаллардан ҳеч бири йўқ” тутун детекторлари кўрсатилганлигини тушунтирди. Расмий Люблянанинг қўшимча қилишича, Россия Ташқи ишлар вазирлиги бу суратдан Ядро чиқиндилари агентлигининг хабарисиз фойдаланган.
"Словенияда радиоактив чиқиндилар хавфсиз ва назорат остида сақланади. У ҳар қандай ифлос бомбаларни ишлаб чиқариш учун ишлатилмайди", - дея таъкидлади мамлакат ҳукумати.
Эслатиб ўтамиз, 23 октябрь куни Россия мудофаа вазири Сергей Шойгу Франция, Туркия, Буюк Британия ва АҚШдаги ҳамкасбларига қўнғироқ қилиб, Украина гўёки “ифлос бомба” – радиоактив моддалар ёки чиқиндилар билан тўлдирилган каллак ёки ракета ёрдамида провокация тайёрлаётгани ҳақида огоҳлантирди. Россия мудофаа вазирлиги ўз қўрқувини ўша пайтда ҳеч қандай далил билан тасдиқламади.
Украина бу айбловларни қатъиян рад этиб, уларни "хавфли ёлғон" деб атади. Президент Зеленский Телеграмда. Киев Украинада “ифлос бомба” ишлаб чиқарилмаганига ишонч ҳосил қилиш учун МАГАТЭ инспекторларини мамлакатга ташриф буюришга таклиф қилди.
