Интернет фойдаланувчиларининг шахсий маълумотларидан фойдаланиб, уларнинг шаъни ва обрўсига путур етказувчи «пост»лар кўринишида ижтимоий тармоқларда тарқатмаслик эвазига пул талаб қилиш ҳолатлари кузатилмоқда. Бу ҳақда ИИВ Ахборот хизмати хабар бермоқда.
"Ҳозирги кунда мамлакатда бундай каналлардан бир нечтаси аниқланган бўлиб, уларнинг юритувчилари хориж давлатларидан туриб фаолият кўрсатишади.
Вазирлик томонидан шу ва бошқа турдаги жиноий фаолият билан шуғулланувчи барча каналлар юритувчиларининг электрон манзиллари аниқланиб, ўрнатилган тартибда хорижий ҳамкорларни жалб қилган ҳолда терговга қадар текширувлар ўтказилмоқда. Текширув якунлари юзасидан товламачилик қилаётган шахсларга нисбатан қонуний чора кўрилади.
Афсуски, мазкур жиноий каналларни блоклашнинг техник имкониятлари мавжуд эмас. Шунинг учун каналлар номи ошкор этилмайди.
Шу ўринда, фуқароларга шахсий маълумотларни ижтимоий тармоқларга қўймасликни ёки бегона гуруҳ ва каналларга тарқатмасликни, акс ҳолда товламачиларнинг қурбонига айланиши мумкинлигини эслатиб ўтамиз", дейилади хабарда.
