Доминикан Республикасига дам олишга борган россиялик аёл Зика вирусини юқтирганлиги аниқланди, дея хабар берди “Lenta.ru” нашри.
Бу аёл Россия фуқаролари орасида Зика вирусини юқтирган илк одамдир. Аёл Москвага қайтганда уни ҳеч нима безовта қилмаган, орадан бир неча кун ўтгач, ўзини ёмон ҳис қилиб, иссиғи кўтарилган ва тошма тошган. У зудлик билан юқумли касалликлар шифохонаси боксига жойлаштирилган. Ҳозирда унинг аҳволи қониқарли даражада, оила аъзолари кузатув остига олинган, уларда вирус аниқланмаган. Доминикан Республикасидан аёл учиб келган самолёт бортида ҳам эпидемияга қарши чора-тадбирлар ўтказилиб, йўловчилар тиббий кўрикдан ўтказилган, уларда касаллик аниқланмаган.
Россия иқлими шароитида касалликнинг тарқалиш хавфи мавжуд эмас. Бу касаллик Африка, Осиё, Жанубий Америка орқали бутун ер юзига шиддат билан тарқалмоқда. У асосан Aedes aegypti пашшаси чаққандагина юқади. Ҳозирча унинг жинсий йўл билан юқиш-юқмаслиги аниқланмаган. Вирусга қарши курашувчи вакцина топилмаган. Касаллик баланд ҳарорат ва тошма билан биргаликда кечади. Тадқиқотларга қараганда, Бразилияда бу касаллик минглаб чақалоқларнинг мия касаллиги билан туғилишига сабаб бўлган.
