Kuz-qish mavsumi kelishi bilan soxta tadbirkorlar harakatga tushib qolgan ko`rinadi. "Bojxona organlari tomonidan tovar moddiy boyliklarini yurtimizga noqonuniy yo`llar bilan olib kirishga bo`lgan urinishlar o`z vaqtida bartaraf etilmoqda", - deya xabar bermoqda Davlat bojxona qo`mitasi Matbuot xizmati.
Jumladan, ''Olot'' chegara bojxona postiga qo`shni mamlakatdan kirib kelgan “Mersedes-Bens” yuk avtotransporti bojxonachilar tomonidan tegishli tartibda ko`zdan kechirildi.
Natijada, avtomashinadagi yuklar bilan ularga tegishli kuzatuv hujjatlarida ko`rsatilgan malumotlarda o`zaro nomuvofiqlik mavjudligi malum bo`ldi.
Tekshiruv jarayonida yuk kuzatuv xujjatlarida qayd etilgan keramik plitkalardan tashqari, avtomashinada umumiy qiymati 458,39 million so`mlik uy isitish uchun mo`ljallangan radiatorlar borligi aniqlandi.
Hozirda yuqoridagi holat yuzasidan bojxona organlari tomonidan surishtiruv harakatlari davom ettirilmoqda.
