Andijonda neft mahsulotlari ishlab chiqaruvchi yashirin sex faoliyati oshkor etildi, deb xabar qilmoqda "“Xalq so`zi" nashri.
"Andijonneft" AJ zavodi liniya nazoratchisi bo`lgan fuqaro Zoirjon Mamatqulov 1 mln so`m evaziga "Andijon-Asaka-FNQIZ" neft quvuri liniyasi qaerdan o`tganini haqidagi maxfiy ma`lumotni 3 nafar fuqaroga sotadi.
Shundan so`ng fuqarolar Furqat Fayziev, Xalimjon Matxoliqov va Qayumjon Boqievlar Quva tumani Bahor MFY hududidan oqib o`tadigan qora oltinni o`g`irlash bo`yicha reja tuzishga kirishadilar.
Shu maqsadda Toshloq tumani Yakkavut MFY, Beruniy ko`chasi, 282-uyda yashovchi Nodirbek Meliboev va Bobirbek Ne`matovlar bilan jinoiy til biriktirib, ularning xonadonida neft mahsulotlarini ishlab chiqaradigan yashirin sexni tashkil qilish ishlarini boshlab yuboradilar.
Ma`lumotlarga ko`ra, o`tgan vaqt mobaynida bu erda qo`lbola usulda metalldan tayyorlangan uskunada 1,120 litr neft xom ashyosini qaynatish orqali 490 litr mazut va 100 litr solyarka tayyorlangan.
Polietilen qoplarda tashilayotgan neft mahsulotlari fuqarolarda shubha uyg`otgan va ular huquqni saqlash organlariga xabar qilishgan. Huquqbuzarlar daliliy ashyolar bilan qo`lga olindi. Hozirda ularga nisbatan O`zR JKning tegishli moddalari bilan jinoyat ishi qo`zg`atilib, tergov harakatlari olib borilmoqda.
"Shu o`rinda, neftni qayta ishlash o`ta xavfli ish ekanligi, u bilan uy sharoitida shug`ullanish nafaqat xonadon egasiga, balkim barcha qo`shni xonadonlarga ham katta talofat etkazishi mumkinligini haqida eslatib qo`ymoqchimiz", - deb yozadi nashr.
