Shu yilning 22 yanvar kuni O`zbekiston milliy olimpiya qo`mitasi prezidenti va O`zbekiston futbol federasiyasi 1-vise-prezidenti Umid Ahmadjonov Ispaniyada rasmiy tashrif bilan bo`lib, "Real Madrid" klubi akademiyasi direktori Xulio Ronko bilan uchrashgan edi.
Uchrashuv davomida "Qirollik klubi"ning Real Madrid Foundation Clinic dasturi asosida O`zbekistonda "Real Madrid" klubining futbol maktabi ochilishi bo`yicha kelishuvga erishilgandi.
Ana shu kelishuv bo`yicha ish tartibini yo`lga qo`yish maqsadida O`zbekiston Professional futbol ligasi direktori Omon G`ofurov Ispaniyaga tashrif buyurib, “Real Madrid” akademiyasi rahbariyati bilan uchrashdi.
Kelishuvga ko`ra "Real Madrid"da faoliyat yuritayotgan murabbiylarni O`zbekistonga olib kelish bo`yicha ham hamkorlik qilinadi. Ular futbol maktablarida mashg`ulotlar o`tkazish, futbolchilar bilan ishlash jarayonlari haqida o`z tajribalari bilan o`rtoqlashadilar.
Shuningdek, yurtimizdagi iste`dodli bolalarni "Real" Madridga olib borish, "Qirollik klubi" tomonidan tashkil etiladigan musobaqalarda ularning ishtirokini ta`minlash bo`yicha ham hamkorlik qilinadigan bo`ldi.
Ma`lumot uchun, "Real Madrid" Akademiyasi dunyoning eng kuchli va zamonaviy akademiyalaridan biri bo`lib, akademiya hududi 50 gektar joyni egallaydi. Bu erda 1000 nafarga yaqin xoimlar ish olib boradi. "Qirollik klubi" akademiyasi ayni paytda xorijiy davlatlarda faqat Real Madrid Foundation Clinic dasturi asosida ish olib bormoqda.
O`ZFL xabariga ko`ra, endilikda ushbu dastur asosida "Real Madrid" metodologiyasini o`zbekistondagi futbol klublarida ham qo`llash, futbolchilar bilan yangicha uslubda mashg`ulotlar o`tkazish yo`lga qo`yiladi.
