Amaldagi tartiblarga muvofiq, respublika hududiga
qalbakilashtirilgan mahsulotlar va tovarlarni noqonuniy olib kirishga chek
qo`yish maqsadida bojxona chegarasi orqali tovarlarni olib kirayotgan yuk
tashuvchilar chegarani kesib o`tgan joyidagi bojxona organlariga
o`tkazilayotgan tovarlar to`g`risidagi ma`lumotni, shu jumladan ularning
nomi, miqdori, vazni va yuklar qiymati, tegishli tovar kodlari haqidagi
ma`lumotni taqdim etishlari shart.
Yaqinda Toshkent shahar bojxona boshqarmasining “Chuqursoy texnik idora”
chegara bojxona posti xodimlari Respublika transport prokuraturasi
xodimlari bilan hamkorlikda Xitoy davlatidan mas`uliyati cheklangan jamiyat
nomiga kelgan konteyner korxona rahbari E.Toshev (maqoladagi barcha ism-shariflar o`zgartirilgan)
ishtirokida ochilib, ko`zdan kechirilganda mazkur konteynerda yo`l-yuk
hujjatlarida qayd etilgan umumiy qiymati salkam 7000 AQSh dollarini
tashkil etuvchi, vazni 26 tonnadan ortiq “Pol uchun qoplama” tovari o`rniga
yuk kuzatuv hujjatlarida umuman ko`rsatilmagan turli xil kiyim-kechak,
kosmetika va parfyumeriya mahsulotlari yuklanganligini fosh etishdi.
Daliliy ashyo sifatida vaqtincha olib qo`yilgan tovar moddiy
boyliklarning umumiy qiymati dastlabki hisob-kitoblarga ko`ra 2 milliard
100 million so`mdan ortiqni tashkil etdi.
Shunga o`xshash holatda mazkur post xodimlari
Respublika transport prokuraturasi xodimlari bilan hamkorlikda horijdan
poytaxtimizda faoliyat yuritayotgan mas`uliyati cheklangan jamiyat nomiga
kelgan konteynerni o`rnatilgan tartibda bojxona ko`rigidan o`tkazishganda
yo`l-kuzatuv hujjatlarida qayd etilgan umumiy qiymati 4315 AQSh dollariga
teng, vazni salkam 17 tonnani tashkil etgan “Poliuritan qoplamali tekstil
mahsulotlari” o`rniga umumiy qiymati salkam 2 milliard so`mni tashkil
etuvchi kiyim-kechak va boshqa mahsulotlar ortilgani aniqlandi.
Hozirda yuqoridagi holatlar yuzasidan bojxona tekshiruvlari va surishtiruv harakatlari davom ettirilmoqda.
Shu o`rinda yurtdoshlarimizdan bojxona qoidabuzarliklari yoki bojxona
xodimlarining noqonuniy xatti-harakatlari yuzasidan Toshkent shahar bojxona
boshqarmasining 120-76-71 - “Ishonch telefoni” raqamiga qo`ng`iroq qilishlari
mumkinligini eslatib o`tamiz.
