"Darakchi" gazetasining "Qaltis savol" loyihasi mehmoni yosh bo`lsa-da, ozmi-ko`pmi o`z muxlislariga ega bo`lishga ulgurgan, izlanishdan to`xtamaydigan xonanda Ulug`bek XOLIQOV...
Musiqiy loyihada ishtirok etib, ijodiy imkoniyatlaringizni sinab ko`rdingiz. Xo`sh, hali nimalarni eplolmas ekansiz?
— Musiqiy loyihada ishtirok etganimga to`rt yil bo`ldi, bu katta muddat. O`sha vaqtda yosh ekanligim va tajribasizligim ijodiy jarayonda sezilgan. Qo`shiq yozish, she`rini yodlash borasida ham tezkorlikka tayyor emasligim pand bergan. Xatolarimdan xulosa chiqarganman.
Ulug`bek Xoliqov, deganda “musiqiy loyiha g`olibi va shou xonandasi”, degan ta`rifni eshitamiz. San`at ta`limini olgan ijodkor sifatida bu marralar sizni qoniqtiradimi, asli ko`zlagan marrangiz qaergacha?
— Musiqiy loyihadagi ishtirokim tasodif bo`lgan. Tanishim qo`ng`iroq qilib, qatnashib ko`rishimni aytganida, avvaliga xohlamaganman. Taqdir ekan, loyihada ishtirok etdim va g`olib bo`ldim. Shouga kelsak, men ishlaydigan telekanal kliplarimni “aylantirib” beradi, evaziga ko`rsatuvda xonandalik qilaman. To`g`ri, musiqa ta`limini olgan ijodkor uchun bular etarlicha cho`qqi emas. Yuqoridagilar ilk odimlar, xolos. Hali ijod qilib, ko`zlagan marralarimga erishishga imkonim bor. Niyatim professional san`atkor bo`lish! Muxlislar qo`shiqlarimni qayta-qayta tinglasa va “zo`r chiqibdi, qoyil!” deganining o`zi men uchun katta yutuq! Qaergacha etib borishimni esa vaqt ko`rsatadi, lekin men ijod qilishdan to`xtamayman.
Sizni hamkasblaringizdan ajratib turadigan o`ziga xos ustun jihatingiz?
— Javob berish qiyin (o`ylanib). Ustun jihatim, balki qo`shiqlarimning she`ri, musiqa va kliplarimning g`oya muallifi va rejissyori o`zim ekanligim, tongga qadar musiqiy sayqalchi bilan birga ishlashimdadir. Ijod qilganimda bor-yo`g`i to`rtta mutaxassis: musiqiy bezakchi, tasvirchi, montaj ustasi, ovoz operatorining yordami kerak bo`ladi, xolos.
Sizda homiy, iste`dod bor, lekin ijodda faol emasligingizga nima sabab, hatto biror hamkasbingizga raqobatdoshga aylanishga ham ulgurmadingiz?
— Prodyuserlik markazi bilan o`n oygina ishladim, hozir erkin ijodkorman. Telekanalning ko`magi bor, xolos. Ijodim sustligining boisi balki hozir homiyim yo`qligi yo hamma ish o`z bo`ynimda ekanidadir.Shunga qaramay, to`rtta klip chiqarishga erishdim. Hatto oxirgi ikkita klipimga o`zim rejissyorlik qilishimga to`g`ri keldi. Ijodni boshlaganimga uch yilgina bo`ldi, hali hammasi oldinda.
Sizningcha, bugun shou-biznes necha foiz tadbirkorlikka aylangan va qachon san`at va tadbirkorlik bir-biridan to`la ajraladi?
— Shou-biznes deyarli to`laligicha tadbirkorlikka aylangan. San`at uchun ijod qiladiganlar barmoq bilan sanoqli. Xonandaning noni faqatgina to`ydan, shu bois majburan to`ybop qo`shiq yozadi. Biror qo`shiq “xit” bo`lsa, hamma xonanda xuddi shunday qo`shiq ijro etishni boshlaydi. Estradadagi bir xillikning sababi ham shunda. Shukr, muxlislar professional san`atkor bilan tadbirkor xonandaning farqiga boryapti. Lekin san`at va tadbirkorlik bir-biridan to`la ajralishi uchun aniq tizim hamda vaqt kerak.
“Jurnalistika sohasida o`qimasa ham bo`ladi”, degan fikrda “mu5” telekanalida teleboshlovchilikka qo`l urib, iqtidoringiz yo`qligini angladingizmi yo ikkita “qayiqning boshini tutib”, suvga g`arq bo`lishingizni tushunib etdingizmi?
— Taklif bo`lganida, boshlovchilikka o`zimda ham qiziqish bo`lgan. Sahna nutqi mukammal bo`lmagan va so`z boyligi kam odamdan talab kuchli bo`ldi. Shu bois loyihani tark etishga qaror qilganman. Qolaversa, muxlislar ham ijodim haqida emas, faqta uy qurilishi bo`yicha savol beradigan bo`lib qolishgandi.
BILASIZMI?
- Ulug`bek Xoliqov 1993 yilning 24 iyulida Samarqand shahrida tug`ilgan.
- O`zbekiston Davlat konservatoriyasiga imtiyozli ravishda qabul qilingan. 2016 yil estrada xonandaligi fakultetini tamomlagan.
- Oilada 2 ta o`g`ilning to`ng`ichi.
Sadoqat ALLABERGANOVA suhbatlashdi.
