Rossiya inson huquqlari bo‘yicha vakili Tatyana Moskalkovaning ma’lum qilishicha, Rossiya 3 mingdan ortiq o‘zbekistonlik mahkumni jazoni o‘z vatanida o‘tash uchun topshirishga tayyor.
Uning aytishicha, Rossiya bu jarayonni qo‘llab-quvvatlaydi, lekin O‘zbekiston tomonidan tegishli xalqaro konventsiya ratifikatsiya qilinmaganligi sababli mahkumlarni qabul qilish imkoni hozircha yo‘q.
Moskalkova mazkur masalani MDH inson huquqlari komissiyasi yig‘ilishida ko‘tarib chiqqan. Uning ta’kidlashicha, mahkumlarni topshirish uchun O‘zbekiston 1998 yilda qabul qilingan, jazoni boshqa davlatda o‘tashni nazarda tutuvchi xalqaro shartnomaga qo‘shilishi lozim.
Ma’lum qilinishicha, ushbu konventsiya Rossiyada 1998 yildan beri amal qiladi. Shuningdek, Belarus, Tojikiston, Qozog‘iston, Armaniston va Qirg‘iziston ham mazkur kelishuvga qo‘shilgan.
Shartnoma ishtirokchi davlatlar fuqarolariga jazoni o‘z yurtida o‘tash imkonini beradi. Uning asosiy maqsadi mahkumlarga nisbatan insonparvar yondashuvni ta’minlash va ularning jamiyatga moslashuviga yordam berishdan iborat.
