Navro‘z va Ramazon hayiti oldidan imzolangan hujjatga ko‘ra, yuzlab mahkumlarga yengillik berildi.
O‘zbekiston prezidenti Shavkat Mirziyoyev tomonidan imzolangan farmonga asosan, jazo muddatini o‘tayotgan va qilmishiga pushaymon bo‘lgan 392 nafar shaxs afv etildi.
Ularning 223 nafari to‘liq ozod qilingan bo‘lsa, 82 nafari jazoni muddatidan oldin shartli ravishda o‘tashdan ozod etilgan. Shuningdek, 34 nafar mahkumning jazosi yengilroq turga almashtirilgan, yana 53 nafarining jazo muddati qisqartirilgan.
Afv etilganlar orasida 3 nafar chet el fuqarosi, 26 nafar ayol, 14 nafar 60 yoshdan oshgan shaxslar hamda 166 nafar yoshlar borligi ma’lum qilindi.
Mas’ul idoralarga ularni jamiyatga qaytarish, ish bilan ta’minlash va ijtimoiy moslashuviga ko‘maklashish bo‘yicha topshiriqlar berilgan.
