Eron delegatsiyasiga Tashqi ishlar vaziri Abbos Aroqchi rahbarlik qilmoqda. Uning tarkibiga, shuningdek, TIV rahbarining iqtisodiy diplomatya bo‘yicha o‘rinbosari Hamid G‘anbari ham qo‘shilgan. AQSh muzokara guruhiga Prezidentning maxsus vakili Stiv Uitkoff boshchilik qilmoqda, delegatsiya a’zolari orasida Jared Kushner ham bor.
Muzokaralar oldidan har ikki tomon rahbarlari Ummon Tashqi ishlar vaziri Badr bin Hamad al-Busaidiydi bilan uchrashuv o‘tkazgan. Eron TIV rahbari Tehron muzokaralarga “o‘z huquqlarini himoya qilishga qat’iy bel bog‘lagan holda” kirishayotganini bildirgan. Eron uchun asosiy ustuvor masala sanksiyalarni bekor qilish yoki yumshatish hisoblanadi.
Xabarlarga ko‘ra, Vashington kun tartibini kengaytirishga uringan, ammo Tehron faqat yadroviy dastur masalasini muhokama qilishga rozi bo‘lgan. “Axios” nashri manbalariga ko‘ra, ushbu mulogotlar arab ittifoqchilarining AQSh prezidentiga bosimi ortidan tashkil etilgan.
Eslatib o‘tamiz, 2025 yilda ham Stiv Uitkoff va Abbos Aroqchi Ummonda besh raund muzokara o‘tkazgan, biroq ular natijasiz yakunlangan. Iyul oyida AQShning Eron yadroviy ob’ektlariga zarbasidan keyin tomonlar o‘rtasidagi aloqalar to‘xtatilgan edi. 26 yanvar kuni esa Donald Trump Eronni yadroviy quroldan to‘liq voz kechishni nazarda tutuvchi yangi bitim tuzishga chaqirgan.
