Bugun jahonning turli nuqtalaridan internet foydalanuvchilari Facebook, X (sobiq Twitter), ChatGPT, Spotify, Yandex Music va hatto Amazon xizmatlariga kirishda jiddiy muammolarni qayd etdi. Bu haqda Zamon.uz ma'lum qildi.
Uzilishlarga Cloudflare infratuzilmasidagi texnik nosozlik sabab bo‘lgani ma'lum qilindi.
Cloudflare — global internet trafigining taxminan 20 foizini boshqaruvchi yirik infratuzilma va xavfsizlik provayderi hisoblanadi. Uzilishlar avj olgach, kompaniya muammodan xabardor ekanini tasdiqladi va bartaraf etish ishlari jadal davom etayotganini bildirdi.
Ma'lumotlarga qaraganda, kompaniya biroz oldin Santiagodagi data-markazda rejali texnik ishlar haqida ogohlantirgan, ammo ushbu ishlar global uzilishga qay darajada ta'sir qilgani hali aniq emas.
Hodisa internet infratuzilmasining barqarorligining qanchalik muhim ekanini yana bir bor namoyon etdi. Hozircha platformalarni to‘liq tiklash ishlari davom etmoqda.
