Toshkent shahar Mirzo Ulug‘bek tumanidagi maktablarning birida yong‘in sodir bo‘ldi. FVV holat yuzasidan ma’lumot berdi.
Unda aytilishicha, bugun, 13 oktyabr kuni soat 17:23 da Toshkent shahar FVBga 208-maktab hududidagi ta’mirlanayotgan bo‘sh binoning tom qismida yong‘in sodir bo‘layotgani to‘g‘risida xabar kelib tushgan.
Xabarga asosan, yong‘in-qutqaruv ekipajlari aytilgan manzilga soat 17:28 da yetib borib, yong‘in soat 17:39 da qurshab olingan hamda soat 17:42 da bartaraf etilgan. Yong‘in vaqtida maktab xodimlari va o‘quvchilar bo‘lmagan.
Hodisaning sababi ta’mirlash ishlari vaqtida yong‘in xavfsizlik qoidalariga rioya etmaganlikdan, deya taxmin qilinmoqda, zarari aniqlanmoqda.
