Qashqadaryo viloyatida 27 yoshli fuqaro shifoxonaga yetib bormay hayotdan koʻz yumdi. Bu haqda viloyat Sogʻliqni saqlash boshqarmasi rasmiy xabar berdi.
Maʼlum qilinishicha, bemor — 1998 yil 12 mayda tugʻilgan O.S. ismli fuqaro 2025 yilning 9–11 avgust kunlari Yakkabogʻ tuman tibbiyot birlashmasining Reabilitatsiya boʻlimida davolangan. U burundan qon ketishi, tanadagi toshmalar va umumiy holsizlikdan shikoyat qilgan.
Shifokorlar tomonidan oʻtkazilgan tahllillar va maslahatlar asosida unga idiopatik trombositopenik purpura tashxisi qoʻyilgan. Bemor holatining ogʻirligi inobatga olinib, u viloyat koʻp tarmoqli tibbiyot markazining gematologiya boʻlimiga yoʻnaltirilgan.
Biroq bemor 11 avgust kuni yaqinlari tomonidan viloyat shifoxonasiga olib borilmasdan uyiga qaytarilgan. Oʻsha kuni kechqurun holati ogʻirlashgan bemor yana Yakkabogʻ tuman tibbiyot birlashmasiga murojaat qilgan va zaruriy tibbiy yordam koʻrsatilgan.
Oradan bir kun oʻtib, 12 avgust tongida bemor oʻz xohishi va qarindoshlari tashabbusi bilan yana viloyat shifoxonasiga olib ketilgan. Afsuski, u shifoxonaga yetib bormasan vafot etgan.
Rasmiy maʼlumotga koʻra, marhum bir necha yildan buyon “D” nazoratida boʻlgan. Hozirda holat yuzasidan huquqni muhofaza qiluvchi organlar tomonidan surishtiruv ishlari olib borilmogʻda.
Eslatib oʻtamiz, bundan avval Toshkentdagi xususiy klinikada burun operatsiyasi vaqtida 9 yoshli bola vafot etgani haqida xabar berilgan edi.
