Angliyada 16 yoshga to‘lmaganlarga do‘konlar, restoranlar, kafelar, savdo avtomatlari va internet orqali Red Bull, Monster va Prime kabi energetik ichimliklarni sotish taqiqlanadi. Bu haqda BBC xabar berdi.
Bildirilishicha, Buyuk Britaniya bolalarining uchdan biri har hafta energetik ichimlik iste'mol qiladi. Aksariyat supermarketlar allaqachon ixtiyoriy taqiqni joriy etgan. Ba'zi ichimliklar ikki stakan qahvadan ham ko‘proq kofeinga ega. Ortiqcha iste'mol bosh og‘rig‘i, uyqusizlik, tez yurak urishi va yurak ritmi buzilishiga sabab bo‘lishi mumkin.
Kamdan-kam hollarda ortiqcha kofein o‘limga ham sabab bo‘lgan. Shakarli turlari esa tishlarga zarar yetkazib, semirishga ham olib keladi.
“Bu ichimliklarning sog‘liqqa, diqqatni jamlashga va o‘qishga ta'sirini ko‘rishingiz mumkin, shuning uchun biz choralar ko‘rmoqdamiz”, degan Sog‘ligni saqlash va ijtimoiy ta'minot vaziri Ues Striting.
Qonun loyihasini muhokama qilish uchun 12 hafta davomida sog‘liq va ta'lim mutaxassislari, jamoatchilik, chakana sotuvchilar va ishlab chiqaruvchilar fikri yig‘iladi. Taqiq amaldagi parlament muddati tugashidan ancha oldin kuchga kirishi kutilmog‘da. Bite Back nomli yoshlar faollari guruhidan 18 yoshli Carrera ishlab chiqaruvchilar bolalarni jalb qilish uchun bloggerlar bilan ishlashini aytdi. Striting esa bunga javoban hukumat “zamonga moslashishi” va ijtimoiy tarmoqlardagi reklamalarga qarshi ham choralar ko‘rishi lozimligini ta'kidladi.
