Rossiya hukumati 1995 yil 8 fevralda Ukraina bilan tuzilgan kelishuv asosida faoliyat yuritib kelgan 20 ta chegara nazorat-o‘tkazish punktini rasman yopish haqida qaror qabul qildi. Bu haqda TASS agentligi xabar bermoqda.
Yangi qarorga ko‘ra, 2025 yil 1 avgustdan boshlab 13 ta avtomobil va 7 ta temiryo‘l punktlari butunlay yopiladi.
Agentlikning qayd etishicha, yopilayotgan o‘tkazish nuqtalari orasida 2022 yilda Rossiya tomonidan bir tomonlama tartibda “anneksiya” qilingan Luhansk, Donetsk, Xerson va Zaporoje hududlarida joylashgan punktlar ham bor.
Moskva bu hududlarni endilikda o‘zining ichki qismi deb hisoblaydi va ular orqali rasmiy chegara nazorati zarur emas, deya ta’kidlamoqda.
