Boston shahridagi okrug sudyasi Ellison Barrouz Tramp ma’muriyati tomonidan taklif etilgan va xalqaro talabalarning AQSHga kelib o‘qishini taqiqlashga qaratilgan tashabbus yuzasidan o‘z qarorini e’lon qildi.
Sudya Barrouz bu qarorni Tramp ma’muriyatining “nufuzli akademik muassasani nazorat qilishga qaratilgan noto‘g‘ri urinishi” deb baholadi va uni fikr bildirish erkinligiga tahdid deb atadi.
U ta’kidlashicha, ushbu ish so‘z va fikr erkinligini himoya qilish bilan bevosita bog‘liq bo‘lib, shu sababli ma’muriyatning bu harakatlari vaqtincha to‘xtatilishi kerakligiga qaror qilgan.
Tramp va Garvard o‘rtasidagi ziddiyat
Avvalroq federal hukumat universitetlarda, jumladan Garvardda ham, Falastinni qo‘llab-quvvatlagan talabalar namoyishlari va xilma-xillik, tenglik hamda inklyuzivlik masalalariga bag‘ishlangan dasturlar tufayli moliyalashni to‘xtatish bilan tahdid qilgandi.
Shu doirada AQSHning Adliya vazirligi, Sog‘liqni saqlash va ijtimoiy xizmatlar vazirligi, Ta’lim vazirligi va Davlat xizmatlari boshqarmasi (GSA) “Antisemitizmga qarshi kurashish bo‘yicha maxsus guruh” tuzgan.
Tramp ma’muriyati Garvard universitetiga ajratilgan 2,2 milliard dollarlik federal mablag‘larni muzlatib qo‘yish, shuningdek, 60 million dollarlik shartnomalarni to‘xtatish haqida qaror qabul qilgan.
Bunga javoban Garvard sudga murojaat qilib, federal hukumatning harakatlari qonunga zid ekanini ma’lum qilgan va bu choralarni vaqtincha to‘xtatib turishga erishgan.
