Eron parlamenti strategik ahamiyatga ega Ormuz bo‘g‘ozini yopish masalasini ma’qulladi. Bu haqda 22 iyun kuni mamlakatning rasmiy telekanali “Press TV” xabar berdi.
Qayd etilishicha, bo‘g‘ozni yopish bo‘yicha yakuniy qarorni Eronning Oliy milliy xavfsizlik kengashi qabul qilishi kerak. Ya’ni hozircha so‘nggi nuqta qo‘yilmagan.
Ma’lumot uchun, Ormuz bo‘g‘ozi – Eron va Ummon o‘rtasida joylashgan muhim dengiz yo‘lagi bo‘lib, u orqali dunyo bo‘yicha tashiladigan neft va gazning qariyb 20 foizi o‘tadi. Bo‘g‘ozning yopilishi nafaqat Yaqin Sharq, balki butun dunyo energetika xavfsizligiga jiddiy tahdid solishi mumkin.
“Reuters” tahlilchisi Ron Busso bu vaziyatga izoh berar ekan, Tehronning bunday harakati AQSH harbiy-dengiz kuchlari tomonidan darhol javobga uchrashini aytadi. Unga ko‘ra, agar Eron bo‘g‘ozni to‘sishga urinsa, global neft oqimida qisqa muddatli uzilishlar kuzatiladi, biroq bu uzoq davom etmaydi.
Ammo savol ochiq: bu tashabbus nimadan dalolat? Eron bu orqali bosimni oshirmoqchimi? Yoki bu – AQSH va Isroilga nisbatan ogohlantiruvmi?
Ayni paytda neft bozorida keskinlik kuchaymoqda. Ekspertlar fikricha, vaziyat yanada keskinlashsa, neft narxlari keskin ko‘tarilishi mumkin.
Bo‘g‘oz hali yopilgani yo‘q. Ammo tahdid yetib kelgan. Eron parlamentining qarori – bu faqat siyosiy ishora emas, balki global iqtisodiyot uchun signal sifatida baholanmoqda.
