Isroil harbiy-havo kuchlari Yaman poytaxti Sanodagi xalqaro aeroportni va bir necha muhim energetika obyektlarini bombardimon qildi.
Isroil aviatsiyasi Sano xalqaro aeroportining asosiy yo‘lovchi terminali va texnik inshootlarini butunlay vayron qilgan. Bundan tashqari, poytaxtning turli tumanlarida joylashgan energiya obyektlari — Bani al-Xaris tumanidagi "Dahban" markaziy elektr stansiyasi, Sana janubidagi "Haziz" stansiyasi va Maiyn tumanidagi "Asr" elektr stansiyasi ham havo hujumlariga uchradi.
Shuningdek, Amran viloyatida joylashgan sement zavodiga ham zarba berilgani xabar qilindi.
Isroil armiyasi hujum oldidan fuqarolarni aeroport hududini zudlik bilan tark etishga chaqirdi. Armiya rasmiysi Avixay Adrai ijtimoiy tarmoqda shunday ogohlantiruv berdi:
«Aeroport hududini darhol tark eting, qolish hayotingiz uchun xavfli bo‘lishi mumkin».
Isroil rasmiylarining ta’kidlashicha, husiylar Sano aeroportini qurol va jangarilarni tashish uchun foydalanayotgan bo‘lgan va bu obyekt "harbiy maqsadda qo‘llanilgani" uchun yo‘q qilingan”.
Bu hujum 5 may kuni husiylar tomonidan Tel-Aviv yaqinidagi Ben Gurion xalqaro aeroportiga amalga oshirilgan raketalar hujumiga javob sifatida amalga oshirilgani aytilmoqda. Raketa Isroil havo mudofaa tizimi tomonidan to‘xtatilolmagan va aeroport atrofida katta chuqurliklar hosil qilgan.
Husiylar 5 may kuni Isroilga nisbatan to‘liq havo muhosarasini e’lon qilgan va uning aeroportlariga muntazam zarbalar berishga va’da bergan edi.
Bundan tashqari, 6 may kuni Isroil harbiylari Hudayda dengiz portini ham nishonga oldi. Hujum natijasida 4 kishi halok bo‘ldi, 39 nafar kishi yaralandi. Reuters agentligining manbalariga ko‘ra, portning 5ta doki, omborxonalar va bojxona hududining 70 foizdan ortig‘i shikastlangan. Bu port Yamanning oziq-ovqat importining 80 foizini tashkil etuvchi asosiy yo‘lak hisoblanadi.
Isroil Bosh vaziri Binyamin Netanyaxu hujumlar bosqichma-bosqich davom etishini ma’lum qildi. Hozircha husiylar tomonidan amalga oshirilgan hujumlarda qurbonlar qayd etilmagan bo‘lsa-da, Isroil mintaqada xavfsizlikni ta’minlash uchun o‘z pozitsiyasini saqlab qolishga qaror qilgan.
So‘nggi xabarlarga ko‘ra, yaqin kunlarda husiylar Isroil bilan havo qatnovini to‘xtatish maqsadida uning aeroportlariga hujumlarni kuchaytiradi. Bu haqda Livanning Al-Akhbar gazetasi Sanadagi harbiy manbalarga tayangan holda xabar berdi. Manbaning so‘zlariga ko‘ra, G‘azo sektoridagi urush tufayli Isroilga nisbatan «maksimal bosim» siyosati doirasida husiylar o‘z hujum maqsadlari ro‘yxatiga Xayfa shahridagi ko‘plab muhim obyektlarni ham kiritmoqchi.
Abdulloh Sayyid
