AQSh Davlat departamenti mamlakat fuqaroligidan rasman voz kechish uchun belgilangan to‘lovni qariyb 80 foizga qisqartirdi. Bu haqda CNN nashri Federal Register’da e’lon qilingan qarorga tayanib xabar berdi.
Yangi tartibga ko‘ra, fuqarolikdan chiqish to‘lovi 2 350 dollardan 450 dollarga tushirildi. Mazkur o‘zgarish 13 martdan kuchga kirgan. Qiziqi shundaki, bu miqdor 2010 yilda ilk bor joriy etilgan stavkaga teng.
2015 yilda xorijda yashovchi amerikaliklar uchun soliq hisobotlari kuchaytirilgach, fuqarolikdan voz kechish holatlari ko‘paygan. Shu sababli to‘lov ma’muriy xarajatlar bahonasida keskin oshirilgan edi.
Shu bilan birga, AQSh fuqaroligidan chiqish jarayoni murakkab bo‘lib, ariza beruvchi konsullik xodimlari bilan bir necha bor suhbatdan o‘tishi va qarorining oqibatlarini to‘liq anglaganini tasdiqlashi talab etiladi. Faqat shundan keyingina rasmiy qasamyod va hujjatlarni ko‘rib chiqish jarayoni boshlanadi.
Ma’lum qilinishicha, mazkur qaror xorijda yashovchi amerikaliklar, xususan Fransiyadagi "Tasodifiy amerikaliklar assotsiatsiyasi"ning ko‘p yillik huquqiy kurashi natijasida qabul qilingan.
Tashkilot ma’lumotiga ko‘ra, 2023 yildan buyon kamida 8 755 nafar shaxs yuqori to‘lovni to‘lab, fuqarolikdan voz kechgan.
