Suriya prezidenti al-Shara tez orada Fransiyaga tashrif buyuradi. Bu haqda Suriya rahbari ma’muriyati xabar berdi. Bo‘lajak tashrif haqida qo‘shimcha ma’lumotlar berilmagan.
Jori yilning 5-fevral kuni telefon orqali muloqot chog‘ida prezident Makron suriyalik hamkasbini yaqin haftalarda Fransiyaga tashrif buyurishni rasman taklif qilgan edi.
Telefon muloqoti chog‘ida ikki davlat rahbarlari Suriyaning kelajagi, terrorizmga qarshi kurash va mamlakatda o‘tish jarayonini davom ettirish zarurligini muhokama qilishgan. Makron Suriya demokratik kuchlarini (SDF) bu jarayonga integratsiya qilish muhimligini ta’kidlagan. Muloqot davomida Suriyaga qarshi joriy etilgan iqtisodiy sanksiyalar ham muhokama qilingan.
SDF (Suriya Demokratik Kuchlari) 2015-yilda Suriyadagi AQSH boshchiligidagi xalqaro koalitsiya ko‘magida tuzilgan kurd harbiy ittifoqidir. Alyansning asosini Suriya shimoli-sharqida faoliyat yurituvchi kurdlarning YPG harbiy-siyosiy tashkiloti tashkil etadi.
Abdulloh Sayyid
