Oral shahrida polisiya xodimiga pora bermoqchi bo`lgan O`zbekiston fuqarosi qo`lga olindi. Bu haqda “Kazinform” xabar berdi.
“G`arbiy Qozog`iston viloyati polisiya departamenti ichki xavfsizlik boshqarmasi boshlig`i, polisiya podpolkovnigi Asxat Imanbaevning xabar berishicha, mazkur fuqaro patrul polisiya bataloni inspektoriga 12 ming tenge pora taklif qilgan. U polisiya xodimidan ma`muriy javobgarlikka tortmasligini so`ragan”, deyiladi xabarda.
Hozirda Qozog`iston Respublikasi Jinoyat kodeksining 367-moddasi 1-qismi (pora berish) bilan sudga qadar tergov harakatlari boshlangan.
Aytilishicha, Qozog`iston polisiya departamentida korrupsiyaga qarshi kurash kuchaytirilib, poraxo`rlar ham, pora beruvchilar ham jazolanyapti.
“Mansabdor shaxsga pora berish Qozog`iston Respublikasi Jinoyat kodeksining 367-moddasida nazarda tutilgan jinoiy huquqbuzarlik ekanligini e`tibordan chetda qoldirmaslik kerak. Buning uchun eng yuqori jazo 10 yildan 15 yilgacha ozodlikdan mahrum qilishdir”, degan Asxat Imanbaev.
