Орал шаҳрида полиция ходимига пора бермоқчи бўлган Ўзбекистон фуқароси қўлга олинди. Бу ҳақда “Каzinform” хабар берди.
“Ғарбий Қозоғистон вилояти полиция департаменти ички хавфсизлик бошқармаси бошлиғи, полиция подполковниги Асхат Иманбаевнинг хабар беришича, мазкур фуқаро патруль полиция батальони инспекторига 12 минг тенге пора таклиф қилган. У полиция ходимидан маъмурий жавобгарликка тортмаслигини сўраган”, дейилади хабарда.
Ҳозирда Қозоғистон Республикаси Жиноят кодексининг 367-моддаси 1-қисми (пора бериш) билан судга қадар тергов ҳаракатлари бошланган.
Айтилишича, Қозоғистон полиция департаментида коррупцияга қарши кураш кучайтирилиб, порахўрлар ҳам, пора берувчилар ҳам жазоланяпти.
“Мансабдор шахсга пора бериш Қозоғистон Республикаси Жиноят кодексининг 367-моддасида назарда тутилган жиноий ҳуқуқбузарлик эканлигини эътибордан четда қолдирмаслик керак. Бунинг учун энг юқори жазо 10 йилдан 15 йилгача озодликдан маҳрум қилишдир”, деган Асхат Иманбаев.
