Avval xabar berganimizdek, Samarqandda xalqaro Oziq-ovqat xavfsizligi konferensiya bo`lib o`tdi. Xalqaro tadbirda dunyoning turli davlatlaridan qishloq xo`jaligiga mas`ul vazirlar, olimlar, mutaxassislar ishtirok etdi. Darakchi.uz ana shunday mehmonlardan biri, Eron Islom Respublikasining qishloq xo`jaligi vaziri o`rinbosari bilan suhbatlashdi.
Vazir o`rinbosari Muhammad Mahdiy Burumandiy ikki davlat o`rtasidagi hamkorlik istiqbollari va buning ahamiyati haqida gapirdi.
"Bu konferensiya O`zbekistonning qishloq xo`jaligi sohasida katta potensialga ega ekanligidan dalolat beradi.
Eron ham cheklovlarga qaramasdan, oxirgi yillarda 24 mlndan tonnadan 135 mln tonnagacha qishloq xo`jaligi mahsulotlarini etishtirdi.
Shuni hisobga olib, ikki mamlakat o`rtasida qishloq xo`jaligining turli sohalarida hamkorlik qilamiz. O`zimizda bor bilimlarni O`zbekistonga beramiz, ularda borini o`rganamiz. Hamkorligimiz shu zayl rivojlanaversa, bu nafaqat ikki mamlakat, balki butun dunyo oziq-ovqat xavfsizligi uchun juda katta foyda keltiradi. Bu xalqaro konferensiya bu yo`ldagi katta qadamdir.
Biz O`zbekiston bilan talabalar almashinuvi, tajriba almashunivini yo`lga qo`yamiz. Shuningdek, meva-sabzavotchilik yo`nalishida ham hamkorlik qilamiz. Chunki O`zbekistonda bor meva Eronga kerak, Eronda bor meva O`zbekistonga kerak.
Qolaversa, O`zbekiston ham, Eron ham suv muammolariga duchor bo`lyapti. Shuning uchun irrigasiya sohasida ham hamkorlik qilishga tayyormiz",dedi Muhammad Mahdiy.
