Nyu-York meri Erik Adamsning aytishicha, davom etayotgan muhojirlar inqirozi shaharni vayron qiladi. Uning so`zlariga ko`ra, 2022 yil aprelidan beri Nyu-York orqali 110 ming boshpana izlovchi o`tgan va bu muammo 12 milliard dollarlik byudjet kamomadiga olib kelgan.
Unga ko`ra, boshpana izlovchilar avvallari Venesueladan kelgan bo`lsa, endi ular Ekvadordan kelmoqda. Bundan tashqari, rus tilida so`zlashuvchi fuqarolar, shuningdek, G`arbiy Afrikadan kelgan muhojirlar Meksika orqali shaharga kelishadi.
“Sizlarga bir narsani aytsam, Nyu-Yorkliklar, men hayotimda hech qachon oxirini ko`ra olmaydigan bunaqa muammoga duch kelmaganman. Bu muammo Nyu-Yorkni vayron qiladi”, dedi janob Adams nutqi davomida.
2021 va 2022 yillarda AQShga migrantlar oqimi rekord o`rnatdi va 2,3 million kishidan oshdi. O`tgan yilning aprel oyida Meksikadan AQShga noqonuniy muhojirlar oqimi so`nggi 22 yil ichida eng yuqori darajaga etdi. Vashington favqulodda holat e`lon qildi. 2023-moliya yili boshidan buyon 1,2 milliondan ortiq muhojir kelgan, deydi AQSh rasmiylari.
Eslatib o`tamiz, sal avval Meksika orqali AQShga kirgan o`zbekistonliklar ustidan tergov olib borilayotgani xabar qilingan edi. Shuningdek, kuni kecha AQSh 2023 yil uchun Green Card berishni yakunlaganini e`lon qildi.
