Ukraina mojarosi avj olgan bir paytda qozog`istonlik internet foydalanuvchilari ekranlarida Rossiya armiyasi safiga qo`shilish uchun 5 ming dollardan ko`proq pul to`lashni taklif qiluvchi e`lonlar paydo bo`la boshladi, deb xabar bermoqda Reuters.
Ma`lum qilinishicha, Rossiya bilan chegaradosh sobiq Sovet respublikasi Qozog`istonda 3 milliondan ortiq ruslar istiqomat qiladi va Rossiyaning eng yaqin ittifoqchilaridan biri bo`lib kelgan. Biroq Ostona hukumati Moskva Ukrainada “maxsus harbiy operasiya” deb atagan amaliyotni qo`llab-quvvatlamadi va tinchlikka chaqirdi.
Qozoqlarga yo`naltirilgan reklamada Rossiya va Qozog`iston bayroqlari hamda "Elkama-elka" shiori aks etgan. Ular rossiyalik harbiylar bilan shartnoma imzolaganlarga 495 ming rubl (5,3 ming dollar) miqdorida bir martalik to`lov, shuningdek, kamida 190 ming rubl (2 ming dollar) oylik maosh va oshkor etilmagan qo`shimcha imtiyozlar va`da qilmoqda.
E`lonlar potensial chaqiruvchilarga Rossiyaning Uzoq Sharqidagi Saxalin viloyatidagi rus armiyasiga qo`shilish imkoniyatini taklif qiladigan veb-saytga olib keladi. Sayt Saxalin viloyatining inson kapitalini rivojlantirish agentligiga tegishli ekanligini, mahalliy hukumat tomonidan tuzilgan tashkilot ekanligini ta`kidlaydi.
Markaziy Osiyoning boshqa mamlakatlari aholisining aytishicha, ularning ayrim vatandoshlari Rossiya armiyasi yoki Rossiyaning "Vagner" kabi xususiy yollanma guruhlari safiga qo`shilgan, ammo yollash odatda millionlab o`zbek, tojik va qirg`iz ishchilari ishlaydigan Rossiyada amalga oshirilgan.
“Opamning sobiq eri o`tgan yilning oktyabr oyida Lisichanskda vafot etdi”, dedi ismini oshkor qilishni istamagan tojikistonlik. – Jiyanlarimdan biri Rossiya qamoqxonasida bo`lganidan keyin "Vagner" guruhiga qo`shildi.
“Qirg`izistonda may oyida mahalliy fuqaro Ukrainaning Lugansk viloyatida Rossiyaning qo`g`irchoq kuchlariga qo`shilgani uchun 10 yilga ozodlikdan mahrum etildi”, deb yozadi gazeta.
Mamlakatning neftga asoslangan boyligi tufayli xorijda qozoq mehnat muhojirlari ancha kam, biroq Ukrainaning Rossiya nazoratidagi qismlarida qurilish ishlari Qozog`iston ish joylarida ham e`lon qilinadi.
