Joriy yilning 5 may kuni poytaxtimizning Yashnobod tumanidagi 103-alohida ta`lim ehtiyojlari bo`lgan bolalar uchun davlat ixtisoslashtirilgan maktab-internatida mehnat yarmarkasi tashkil etildi. Bu haqda Maktabgacha va maktab ta`limi vazirligi ma`lum qildi.
Mazkur yarmarka imkoniyati cheklangan o`quvchilarning kasb-hunar orqali daromad topishlarinini rag`batlantirish maqsadida har yili o`tkazib kelinadi.
“Mohir qo`llardan — mehrli qo`llarga” shiori ostida bo`lib o`tgan yarmarkada bu yil yuzdan ortiq ishlar: rasm, yumshoq o`yinchoq, batik, zardo`zi va munchoqli buyumlar, duradgorlik ishlari taqdim etildi.
Ko`rgazma davomida badiiy chiqishlar, shuningdek, bolalar ishtirokida qiziqarli shou-dasturlar taqdim etildi.
Eslatib o`tamiz, 2022 yilda o`quvchilar qo`l mehnati bilan yasalgan mahsulotlarni sotish orqali 12 mln. so`m daromadga ega bo`lib, mablag`ning bir qismi o`quvchilarning o`zlariga taqdim etilgan.
Joriy yilda mehnat yarmarkasi ko`rgazmasida 20 million so`mdan ortiq mablag` topildi. Yig`ilgan barcha mablag`lar maktab-internatidagi bolalarning ijodiy qobiliyatlarini rivojlantirishga qaratiladi.
