Ijtimoiy tarmoqlarda “E-qaror” elektron tizimi imkoniyatlari va unda e`lon qilingan qarorlar bo`yicha turli fikrlar bildirilmoqda.
Ushbu holat yuzasidan Adliya vazirligi quyidagilarni ma`lum qildi:
"E-qaror elektron tizimi – bu hokimlarni qarorlarini ishlab chiqish, kelishish, qabul qilish va e`lon qilinishini 24/7 rejimida va Internet tarmog`i mavjud bo`lgan dunyoning istagan nuqtasidan foydalanish imkoniyatini beruvchi elektron dastur hisoblanadi. Bu dasturda foydalanishni qachon amalga oshirishni har bir loyiha tayyorlovchi va imzo qo`yuvchi rahbar hamda xodimlar o`zi hal etadi.
Shu bilan birga hokimlikning mas`ul xodimlari tomonidan dastur orqali qaror yoki farmoyish loyihasi juma kuni tayyorlanib hokimga imzoga kiritilgan bo`lsa, qaror loyihasini hokim yakshanba kuni ish joyidan tashqari holda (masalan uyda o`tirib) o`zining planshet yoki boshqa kompyuter texnikasidan foydalangan holda imzolash imkoniyati mavjud. Bunday holatlarda hech kim yakshanba kuni ishga chiqmaydi.
Hozirda respublikaning barcha mahalliy davlat hokimiyati organlarida “E-qaror” elektron tizimi ulangan bo`lib, ushbu tizim orqali yagona makonda 2021 yil 23 iyul holatiga jami 16 mingdan ortiq qaror va farmoyishlar qabul qilinishi ta`minlangan.
“E-qaror” elektron tizimi orqali hokim qarorlari birorta qog`oz ishlatilmasdan elektron tarzda qabul qilinadigan bo`ldi. Bir yilda respublika bo`yicha taxminan 600-700 mingga yaqin turli mazmundagi hokim qarorlari qabul qilinadi, bu yiliga kamida o`rtacha hisobda 5-6 mln qog`oz sarf qilinadi deganidir. ", —deyiladi xabarda.
