Уни ўзига яраша характери бор. Жиззаки, жойи келганида қўрс ва ростгўй. Менга маъқул келгани – унинг тартибсеварлиги Айтилган вақтдан бир неча дақиқага кеч қолса ҳам огоҳлантиради. Менимча, бу ҳурматга лойиқ иш. Суҳбатга таклиф қилганимда бир ҳолат эътиборимни тортди. Ҳеч бир масалада олдиндан фикр билдирмайди. «Насиб қилгани» дея ниятни яхши қилади-ю, аммо бирор нимага ишонтириб ҳам қўймайди. Таҳририятга бўлаётган тинимсиз қўнғироқлар актёр Улуғбек ҚОДИРОВ билан интервью учун етарли асос бўлди. Бу ҳақда унинг ўзига айтганимизда эса ... Яхшиси, қандай муносабат билдирганини суҳбатни ўқиб, билиб олинг.
— Сўнгги ижро этган ролларингиз кўпчиликда қизиқиш уйғотди. Бу ютуқ билан сизни табрикласак бўлади.
— Эътирофлар учун миннатдорман.
— Баъзи актёрларнинг ижодий танаффуси ўзининг зарарига ишлайди. Сизда эса бунинг аксини кўрдик. Томошабинларнинг фикридан ҳам билса бўладики, мухлисларингиз сизни соғинишган.
— Ролларим манзур келганидан хурсандман. Ҳар қандай актёр учун томошабин эътирофи катта ютуқ. Ижодга келсак, аслида у қадар катта узилиш бўлгани йўқ. Аввал суратга тушган фильмларим намойиш этилиб турилди. Қолаверса, оила қурдим, фарзандим туғилди. Ҳаётда ҳар бир инсонга бериладиган азиз неъмат бахтини ҳис этишга муяссар бўлдим.
— Танаффус вақти маҳоратингизни оширдингиз чоғи ёки қаердадир таҳсил олдингизми?
— Изланганим рост. Ўз устимда ишладим. «Ака» фильми учун жиддий тайёрландим. Йигирма килограмм вазн йиғиш осон иш эмас. Режиссёр Воҳид Ғаниевни нафақат ижодкор, балки инсон сифатида ҳам ҳурмат қиламан. У билан биргаликда фильмдаги қаҳрамоним устида ишладик. Қолаверса, ижодий гуруҳ ҳам ҳар бир ҳолатга профессионал даражада ёндашди. «Ака» қишда суратга олинган. Енгил кийимларда, тоғда, суратга олиш жараёнини тасаввур қилаяпсизми? Машаққати бўлгани билан меҳнатимиз натижаси томошабинларга манзур бўлганидан мамнунмиз.
— Аксарият актёрлар ташқи кўринишидаги жиддий ўзгаришлардан иккиланганларида сиз қўрқмасдан 20 килограмма тўлишдингиз?
— Ҳақиқий мухлисларим менимча тўлишган-тўлишмаганимга аҳамият беришмаган. Улар учун яратган образим муҳим бўлган. Ўзим эса премьера куни кўпроқ қаҳрамонимнинг кўзларини кузатдим. Акбархўжа Расулов, Матёқуб Матчонов, Саида Раметоваларнинг ижросини ҳам томоша қилдим. Аммо ўзимни қаҳрамоним экранда кўринганида кўзларим унинг кўзларида бўлди. Қаҳрамоним кўп гапирмаган, асосан кўзлари сўзлаган. Ролим ишонарли чиқиши учун Воҳид Ғаниев кўп нарсаларни тушунтирди. Ижтимоий тармоқ орқали руҳиятида муаммоси бўлганларни кузатдим, ўргандим. Улар ҳам ҳамма қатори инсон. Фақат ўзига хос жиҳатлари бор. Ана шуларни ўрганишга ҳаракат қилдим.
— Роль учун яна қандай қийинчиликларга рози бўлоласиз?
— Олдиндан бир нима деёлмайман. «Ака»дан кейин суратга олинган фильмдаги ролим тамоман бошқача. Яқинда премьера қилинади. Драматургияси яхши сценарий бўлса, ролингиз учун астойдил ҳаракат қиласиз, тайёрланасиз.
— Катта шов-шувга сабаб бўлаётган «Барон» фильмини назарда тутаяпсизми?
— Ҳа. Бу картинада режиссёр Рустам Саъдиев олдимга «Нафақат қаҳрамон характери балки кўринишинг ҳам бошқа ролларингдан фарқ қилиш керак» деган вазифани қўйди. Айтмоқчиманки, ҳар бир ролнинг ўзига яраша қиёфаси бўлади. Бири иккинчисини такрорламаслиги керак.
— Қаҳрамонингизни таништирарсиз балки...
— Фильм тайёр бўлсин, овозлаштириш ишлари якунлансин, кейин суҳбатлашамиз. Келинг, ҳозирча сир бўла қолсин.
— «Улуғбек Қодиров билан партнёр бўлган актрисалар тез танилади» деган гаплар қулоғингизга чалингандир?
— (кулади) Ҳазиллашмаяпсизми?
— Йўқ, нега энди. Буни кўпчиликдан эшитганман.
- Балки бу шунчаки сабабд ё тасодифдир? Билмадим, нима дейишни ҳам билмай қолдим...
- Рафиқангиз партнёрларингиздан рашк қилмайдими?
- Оиламга тегишли саволларга жавоб бермайман.
— Ҳақиқатан ҳам кўзга кўринган актрисалар билан партнёр бўласиз. Бу рўйхатда эстраданинг машҳур хонандалари ҳам бор. Лекин ўзингизга ким билан роль ижро этиш қулай?
— Хонанда Шахзоданинг ижроси жуда яхши. Ролни айтилганидек чиқариб беради. Дилноза Кубаева, Гулчеҳра Эшонқулова иқтидорли актрисалар. Гулчеҳра билан курсдошмиз. Институтда ўқиган кезларимизда ҳам спектаклларда бирга роль ўйнардик. Режиссёр қўйган вазифани битта уринишда бадариб беролади. Устоз актрисалардан Саида опа Раметованинг ижодини ҳурмат қиламан. Тоҳир Саидов билан биргаликда битта ижодий гуруҳда ишласам, доим ўзим учун нимадир оламан. Бу ижодкорлар билан ишлаш актёр учун катта мактаб. Ўрганишга арзирли кўп насрасалар бор.
— Ким билади дейсиз, балки 10-15 йилдан сўнг сизни ҳам кимдир устоз билиб, ҳавас қилса ажабмас...
— Қанийди шундай бўлса! Ният қиламан, шу кунларга етказсин деб.
— Ҳозир ҳам бордир «менга устозлик қилинг» дейдиганлар?
— Мен ҳали устозлик қилиш даражасига етганим йўқ. Ўрганишим керак бўлган нарсалар бор. Ўз устимда ишлаб, изланиб, маҳоратимни оширишишим лозим. Эндигина ўттиз иккига кирдим. Сочимга оқ оралагани бу ёшим ўтиб бораяпти дегани эмас. Одам қандай бўлса шундай кўриниши керак. Маҳоратимни кўрсатишни истаган ролларим ҳали олдинда. Насиб қилса, ёшим қирқдан ошгандан кейин кимдир устозлик қилинг деса, рози бўларман. Лекин ҳозирча бунга тайёр эмасман.
— «Телба» даги ролингиз ҳақиқатан ҳам яхши чиққан. Шу каби роль ижро этиш истаги бўладими ҳеч?
— Эътирофингиз учун раҳмат. Лекин «Телба»даги ролимга ўхшаган роль бўлмаса керак. Унинг даражасидаги каби ижро бўлиши мумкин, аммо айнан унингдек бўлмайди. Омадли чиққан ролни такрорлаш мумкин эмас. Чунки ҳар бир картинанинг ўз тақдири бор. Агар режиссёр актёрга эркинлик берса, у топширилган вазифани айтилганидек ижро этиб беради. Ролнинг омадли чиқиши битта одамга боғлиқ иш эмас-да.
— Турли жанрлардаги фильмларда суратга тушасиз. Мухлисларингиз эса «Улуғбекка кўпроқ мелодрама мос келади» дейишади.
— Ҳамманинг диди ҳар хил. Кимгадир мелодрама, кимгадир комедия жанридаги ролларим ёқади.
— Болливуд юлдузи Шохруҳҳоннинг сўзлари ёдимга тушди: «Актёр экрандаги партнёрини севиши керак бўлса, чиндан севсин. Нафратланиш талаб қилинса, ҳақиқатан ҳам ёмон кўрсин. Шунда образи ишонарли чиқади». Улуғбек Қодиров ҳам фильмдаги партнёрларини севадими?
— Суратга олиш жараёнида севаман, албатта. Йўқса, образим ишонарли чиқмайди. Характер ҳолатига мослашишни институтда ўрганганмиз. Ҳар қандай ҳолатга характеридан келиб чиқиб кириша оламиз. Балки актёрлик бўйича таҳсил олмаганларда ошиқ образи ишонарли чиқмас. Лекин бу борада керакли билими бўлган, устоз ва саҳна кўрган актёрлар партнёрини севиш керак бўлса, севади, нафратланиш керак бўлса, ёмон кўради. Ҳис этиш фақат “съёмка” жараёнида бўлади. Суратга олиш ишлари якунлангач, эса яна ўз ҳолимга қайтаман. Тасаввур қилаяпсизми, агар “съёмка”дан кейин ҳам партнёрларимни севиб юраверсам... (кулади). Бу менга тўғри келмайди. Ролга кириб, ундан чиқа олиш усули актёрлар биладиган сир.
— «Устоз кўрган, ўқиган актёрлар» дедингиз. Бу борада маълумоти бўлмай, фильмларда суратга тушаётганларга муносабатингиз қандай? Касбингизни қизғанмайсизми?
— Қизғанмайман, актёрликка қизиқар экан, омадини берсин. Бирор жойда кўришиб қолсак ҳам танқид қилмайман. Нима қиламан кўнглини оғритиб? Шунчаки, танлаган касби бўйича ўқиган актёр режиссёр талабини дарров тушунади. Чунки шу соҳада сабоқ олган. Ўқимаган, ҳаваскор актёр учун бу салгина қийинроқ бўлиши мумкин. Ҳаммаси жараёнда билинади. Лекин улар орасида ҳақиқий иқтидор эгалари ҳам бор.
— Машҳурлик, истайсизми-йўқми, атрофингиздаги инсонларнинг сизга бўлган муносабатини ўзгартиради. Ҳамкасблар орасида рақобат босими сезиладими? Ёки бу даврдан ўтдингизми?
— Турли хил муносабатлар бўлиши мумкин. Лекин эътибор бермасликка ҳаракат қиламан. Рақобат масаласига келсак, ҳеч кимга ҳеч қачон ҳасад қилмаслик керак. Бу яхшиликка олиб келмайди.
— Иш жараёнидан сизни нима чалғитиши мумкин?
- Баъзан суратга олиш жараёнида ўз-ўзидан кулги келиб қолади. Ана шу нарса ишдан чалғитади.
- Режиссёрлик борасидаги орзунгиз ҳали ҳам ўша-ўшами?
- Албатта! Бу масалага жиддий ёндашишни истайман. Мен яратган фильм яхши режиссёрларнинг асарлари қаторида туришини хоҳлайман. Бир-икки кун яшайдиган асар бўлмаслиги лозим. Секин-асталик билан мақсадим сари яқинлашяпман. Насиб қилса амалга ошади!
Дилдора ЮСУФБЕКОВА суҳбатлашди
