Жорий йилнинг тўртинчи чорагидан бошлаб «GM Uzbekistan» АЖ автомобил заводида «Laсetti» автомобилларини газ баллон ускуналари билан жиҳозланган ҳолда ишлаб чиқариб харидорларга етказиш, йиллик ишлаб чиқариш режасига киритилган. Бу ҳақда «Ўзавтосаноат» АК хабар беради.
Мамлакатимизда фаолияти йўлга қўйилган «Автосаноат- Landi Renzo» қўшма корхонаси айнан, мазкур автомобиллар учун газ таъминоти тизими ускуналарини шартнома асосида, Асака автомобил заводига етказиб беради.
Мазкур корхона, шу пайтгача «GM Uzbekistan» АЖнинг юртимиздаги расмий дилерлик марказларини сифатли газ баллон ускуналари билан таъминлаб келмоқда. Шуни айтиб ўтиш лозимки, «Laсetti» автомобилларини экологик тоза ёнилғи турига мослаштирилган ҳолда ишлаб чиқаришда харидорларнинг талаб ва истаклари алоҳида эътиборга олинади.
