Ўзбекистон 14 март соат 00:00 дан бошлаб Франция, Испания ва Буюк Британиядан авиарейсларни тўхтатмоқда. Бу ҳақда, Газета.уз нашри хабар берди.
Шунингдек, Хитой, Жанубий Корея, Италия, Эрон, Франция ва Испания фуқароларига Ўзбекистонга кириш тақиқланди.
Ушбу қарорлар Ўзбекистонда коронавирус хавфининг олдини олиш бўйича тузилган махсус Республика комиссияси томонидан қабул қилинган.
Демак, 14 март соат 00:00 дан кейин Хитой, Жанубий Корея, Италия, Эрон, Франция ва Испания фуқаролари ҳамда бу мамлакатларда яшовчи фуқаролиги бўлмаган шахслар, шунингдек сўнгги 14 кун ичида ушбу 6 та давлатларга ташриф буюрган хорижий фуқаролар ва фуқаролиги бўлмаган шахсларнинг барча чегара пунктлари орқали Ўзбекистонга кириши тақиқланади.
Мазкур чекловлар истисно тариқасида дипломатик ва хизмат паспортлари эгаларига, шунингдек Ўзбекистонга киришдан олдин 14 кун ичида юқоридаги мамлакатларга бормаган шахсларга қўлланилмайди.
Зарур ҳолларда Ўзбекистон фуқароларини олиб келиш учун ушбу мамлакатларга чартер рейслар ташкил этилиши мумкин.
