Йўловчиларга қўшимча қулайликлар яратиш, пойездларга чиқиш олдидан чипталарни текшириш жараёнига сарфланадиган вақтни қисқартириш мақсадида “Ўзтемирйўлйўловчи” AЖ томонидан электрон чипталарни замонавий технологиялар QR-код орқали текширувчи махсус мосламаларни синовдан ўтказиш жараёни бошланди.
Aйни дамда янги мосламалар “Aфросиёб” поездларининг бирида синовдан ўтказилмоқда. Электрон чиптани расмийлаштирган йўловчиларга энди уни A-4 форматида чоп этиш зарурати йўқ, яъни электрон чиптани смартфон ёки планшетларда тақдим этишнинг ўзи кифоя. Назорат-ўтказиш пункти ходимлари ҳамда вагон кузатувчилари электрон чиптанинг ҳақиқийлигини махсус мослама билан текширади, кейин эса йўловчи чипта бўйича ўз жойини эгаллаши мумкин бўлади.
Ҳозирда қурилмалар “Тошкент-Марказий” вокзалида синовдан ўтказилмоқда. Кейинчалик тизим барча вокзалларда жорий этилиши режалаштирилган. Синов ишлари март ойининг охиригача давом этади.
