Хитой ҳукумати карантин режимининг бутун даври якунланмагунча Ўзбекистон фуқароларини олиб чиқиб кетмасликни сўради.
Ташқи ишлар вазирлиги 27 январь куни Ўзбекистон элчиси Бахтиёр Саидов Хитой Халқ Республикаси Ташқи ишлар вазирлиги Европа ва Марказий Осиё департаменти директори Сун Линцзян биланучрашув ўтказилганини маълум қилди.
«Суҳбатда чет эл фуқароларининг Ухань шаҳридан (Хубей провинцияси) эвакуация қилиш билан боғлиқ масалалар муҳокама қилинди. Хитойлик дипломат мамлакат ҳукуматининг коронавирус тарқалишини чегаралаш ҳамда инфекцияни профилактика қилиш ва даволаш борасида кўраётган ҳар томонлама чоралари тўғрисида маълумот берди.
Хитой томони ҳозирда мамлакат ҳукумати чет эл фуқароларини Ухань шаҳридан эвакуация қилиш масаласини кўриб чиқмаётганини яна бир бор тасдиқлади ва эпидемиянинг эҳтимолий тарқалишига йўл қўймаслик мақсадида карантин режимининг бутун даври якунланмагунча Ўзбекистон фуқароларини олиб чиқиб кетмасликни сўради», дейилади Ташқи ишлар вазирлигининг Хитойда бўлиб турган Ўзбекистон фуқаролари яна бир бор мурожаатида.
