2020-йилнинг 16-19-январь кунлари ўзбекистон делегацияси Германия Федератив Республикасига ташриф буюради. Гуруҳга Ўзбекистон Республикаси Қишлоқ хўжалиги вазири Жамшид Ходжаев бошчилик қилиши кутилмоқда.
Бу ҳақда Ташқи ишлар вазирлиги Матбуот хизмати "Даракчи"га хабар берди.
Мамлакатимизнинг Германиядаги Элчихонаси берган маълумотга кўра ташриф чоғида Ўзбекистон делегацияси “Яшил ҳафта – 2020” халқаро кўргазмаси ва Қишлоқ хўжалиги вазирларининг Берлин конференциясида иштирок эхтади.
Ўзбекистон делегациясининг Берлинга ташрифи дастурида ишбилармон шериклар билан учрашувлар ўтказиш билан бир қаторда Германиянинг Озиқ-овқат ва қишлоқ хўжалиги Федерал вазири Юлия Клёкнер ҳамда Польша, Беларусь, Ливан, Молдова, Украина ва бошқа давлатларнинг қишлоқ хўжалиги вазирлари билан музокаралар ўтказиш режалаштирилган.
