Хотин-қизлар қўмитасидан тортиб, Сенатгача мурожаат қилган тадбиркор аёлнинг сўнгги умиди матбуотдан

Ўз муаммосини ҳал этиш учун тадбиркор Ўзбекистон Хотин-қизлар қўмитасидан тортиб, Сенатгача мурожаат қилган. Тадбиркор аёлнинг сўнгги умиди  матбуотдан. 

У истаган нарса эришиб бўлмас мураккаб иш эмас. Шунчаки қонуний Тошкент вилояти ҳокимлиги томонидан қарор тасдиғи ва оддий бир эътибор халос.

Тадбиркорнинг мақсади, фаолиятини кенгайтириш, аҳолини иш билан таъминлаш орқали юртимиз келажагига ҳисса қўшиш. Аммо тадбиркорликни кенгайтириш “ADRAS STILE” масъулияти чекланган жамияти раҳбари учун амалга ошириб бўлмас бир мураккаб ишга айланди.

Унинг эзгу нияти икки йилдирки, амалга ошаётгани йўқ. Тошкент вилояти ва Янгийўл тумани ҳокимликларининг сансалорлиги сабаб, уюм-уюм хат-ҳужжатлар тўпланаяпти халос. 

Янгийўллик тадбиркорнинг сўзларига кўра, у 2018 йилнинг апрель ойида Янгийўл тумани ҳокимлигига ер олиш учун мурожаат қилган.

Туман ҳокимлиги ҳужжатларни кўриб чиқиб, олти ойдан сўнг, яъни 18 сенябрда ер бўйича Тошкент вилояти хокимлиги томонидан комиссияга чиқарилган ва Тошкент вилояти ҳокимлиги томонидан ижобий жавоб берилиб, 21-сонли баённомага киритилган.

Қонун бўйича туман ҳокимлиги 1 ой ичида тадбиркорга қарор бериши лозим эди. Минг афсус, 7 ой деганида туман ҳокимининг 990-сонли қарорини тақдим қилишди. 

Туман ҳоким қарорининг  2-бандида "туман ҳокимининг қарори Тошкент вилояти ҳокими томонидан тасдиқлансин", дейилган, Президентимизнинг 445-ПҚга асосан бир ой ичида Тошкент вилояти ҳокими туман қарорини тасдиқлаши лозим эди. Минг афсус, вилоят ҳокимияти бу қарорни шу кунга қадар тасдиқламай келди.

Кетма-кет мурожаатлар боис, Тошкент вилояти ҳокимининг биринчи ўринбосари қарорни тадбиркорга беради. Шунга қарамай, тадбиркор аёл ҳамон ерга эгалик ҳужжатларини тўлалигича ололгани йўқ. Тошкент вилояти ҳокимлиги мана икки ярим йилдирки, тадбиркорни сарсон қилмоқда.

– Ҳужжатларим тайёр бўлгунча, Тошкент вилоят ҳокимлигида 3 марта ҳоким ўзгарди. Менга берилиши керак бўлган ер атрофида бошқалар қурилиш бошлаб, битказиб ҳам бўлишди. Улар ҳокимларнинг кўнглига қандай йўл топишяпти бу ёғи менга қоронғу. Мен эса ҳали-ҳануз сарсон юрибман, – дейди “ADRAS STILE” МЧЖ раҳбари Л.Ҳошимова. – Беш марта Давлат дастури лойиҳасига киритишди. Туман, вилоят ва яна бошқа бир лойиҳаларга киритиб, имзолатишди. Тайёрланган ҳужжатларга кўра менинг фирмам ўша ерни олиб, фаолиятини бошлаб юборган бўлиши керак. Президентга туман, вилоят ҳокимликлари бу ерда “ADRAS STILE” МЧЖ фаолият бошлагани ҳақида ҳужжат топшириб бўлишган. Амалда эса... ҳеч нарса йўқ.

Давлатимиз раҳбари тадбиркорларга берилиши керак бўлган эътиборни давлат сиёсати даражасига кўтарган бир пайтда айрим мутасадди раҳбарларнинг эътиборсизлиги киши кўнглини хира қилади. Ишлайман, шу юртни обод қиламан, деб бел боғлаган юртдошларимизга айро кўз билан қарашини, аҳолини иш билан таъминлаш энг йирик муаммолардан бўлиб турганда, ҳокимликларнинг ер бермасдан тадбиркорни қийнашини қандай тушуниш керак?

Тадбиркор Л.Ҳошимова икки ярим йилдан буён эзгу мақсадлар учун елиб-югурмоқда. Унинг мақсади 200 нафар шартли равишда жазо ўтовчиларни иш билан таъминлайдиган ишлаб чиқариш очиш эди. Пухта ишлаб чиқилган лойиҳа, маблағ ва ҳужжатлар тайёр, аммо рухсат йўқ.

Президентимиз 2 нафар одамни иш билан таъминлаган тадбиркорни бошимда кўтараман, деган эди.

Мутасаддилар 200 нафар ишсизни иш билан таъминлашни мақсад қилган тадбиркорга ўйлаймизки, бефарқ бўлмасалар керак.