17-сентябрь кунидан 18-сентябрьга ўтар тунда Мирзо-Улуғбек туманида ўғрилик содир бўлган.
Аниқланишича, 36 ёшли Ориф Р. томонидан уйда таъмирлаш ишларини амалга ошириш учун таклиф қилинган номаълум шахс, уй эгаси уйда йўқлигидан фойдаланиб, ётоқхонага киради. Эшигининг қулфини бузиб у ердан умумий нархи 3.325.000 сўмга тенг бўлган нарса-буюмларни ўғирлаб кетган.
Шундан сўнг ғаразгўй воқеа жойидан яширинди. Ушбу факт асосида Ўзбекистон Республикаси Жиноят кодексининг 169-моддаси (“Ўғрилик”) бўйича жиноий иш қўзғатилди. Кўрилган чоралар давомида ИИББ ходимлари гумонланувчи 24 ёшли Рахимжон А.ни қўлга олишди.
“Ҳурматли ҳамшаҳарлар ва Тошкент меҳмонлари! Нотаниш одамларни уйингизда ёлғиз қолдирманг. Ўз мулкингиз ва шахсий буюмларингизни эҳтиёт қилинг!” дея огоҳлантирмоқда тошкент шаҳар ИИББ.
