2019 йилнинг тўққиз ойида Ўзбекистонда жами 50,9 трлн сўмлик қурилиш ишлари бажарилган. Ўсиш суръати ўтган йилнинг шу даврига нисбатан 19,3 %ни ташкил этган.
Жорий даврда жами қурилиш ишлари ҳажми таркибида йирик қурилиш ташкилотлари томонидан бажарилган қурилиш ишлари ҳажми 12,4 трлн сўмни ташкил этди.
Кичик корхона ва микрофирмалар томонидан бажарилган қурилиш ишлари ҳажми жорий даврда қурилиш ишларини бажарган бошқа ташкилотларга нисбатан кескин ошганлиги кузатилди. Улар ҳиссасига жами қурилиш ишлари ҳажмининг 54,3 %и тўғри келиб, ўтган йилнинг мос давридаги кўрсаткичга нисбатан 5,2 % пунктга кўпайди. Шунингдек, улар ҳиссасига тўғри келган қурилиш ишлари ҳажми ўтган йилнинг мос даврига нисбатан 31,7 %ни ташкил этган ҳолда 27,6 трлн сўм миқдорида қайд этилди.
Давлат мулкчилигидаги ташкилотлар томонидан жами 3,1 трлн сўм қурилиш ишлари, нодавлат мулкчилигидаги ташкилотлар томонидан эса 47,7 трлн сўм ишлар бажарилган.
Бажарилган қурилиш ишларининг катта қисми янги бино ва иншоотларни қуришга тўғри келади. Жами қурилиш ишларининг 76,2 %и ёки 38,7 трлн сўм қурилиш ишлари айнан иқтисодиётда янги ишлаб чиқариш қувватлари, турар-жой ва бошқа ижтимоий объектларини яратишга қаратилган.
