Сал аввал халқ депутатлари Бўстонлиқ тумани Кенгаши депутати К.Дусовни “Миллий тикланиш” партияси депутатликка номзодлар рўйхатидан чиқартирилганини маълум қилган эдик.
Уч кундирки, муҳокамалар майдонида бўлиб келаётган депутат билан боғлиқ ҳолатларга блогер Нозим Сафари ўз муносабатини билдирди:
“Дусовни рус эртакларидаги образ, "деревенский дурачок"ка ўхшатаман. У ўзи қандайдир аҳамиятга эга депутат эмас эди. Туман кенгаши депутати, жамоатчилик асосида. Лекин Фейсбукда лоп этиб популизм билан танила бошлади. Кейинчалик уни гапиртира бошлашди. Ҳаммаси шу пайтда бошланди.
Дусов ҳар айтган гаплари янги ва янги хайпларни яратди. Унинг гаплари ўта мантиқсиз ва жуда кулгули эди. Ахборот сайтлари босиб чиқара бошлашди. Одамлар "деревенский дурачок"нинг кейинги баёнотларини ҳам кутадиган бўлишди. "Просмотр"лар ошди. Дусов "звезда"га айланди.
Сиёсий ва диний билими ҳаминқадар бўлган Дусов гапирар, одамлар эса кулишарди. Дусов эса ўзига ўзи ишона бошлади. Аёлларни таҳқирлади, аҳоли билан жанжаллашди, журналистга қўполлик қилди, фейсбукда уйғурлар қасдини олиш учун Хитойга жиҳод қилиш даъватларни, Ўзбекистон қонунчилиги билан тақиқланган радикализмга тўла мақолаларни қўллаб-қувватлади. Куни кеча эса ўз партиясининг раисига ҳам ташланиб кескин қоралади.
Менга унинг қанақа депутат бўлгани қизиқ эмас. Менга уни қандай депутат бўлгани қизиқ. Қандай? Миллий тикланиш мундоқ ўз депутатлари билан гаплашиб, суҳбат қиладими? Билими, онги ва руҳий соғломлигини текширадими? Кўчадан келган хоҳлаган депутат бўлиб кетаверадими?” — дея савол билан тугалланган мулоҳаза.
Эслатиб ўтамиз, аввалроқ, Интернет тармоғида К.Дусовни яшнободликлар билан тортишуви эълон қилинган эди. Бунга депутат томонидан берилган изоҳни ҳам бергандик.
