Учқудуқ туманида хусусий мактабгача таълим муассасаси очиб, ноқонуний даромад топмоқчи бўлганларнинг найранглари фош этилди. Бу ҳақда «Халқ сўзи» хабар берди.
Учқудуқлик тадбиркор Гуллола Хўжаева (исм-шарифлар шартли) туманда хусусий боғча фаолиятини йўлга қўйишни ният тутиб, ҳужжатларни расмийлаштириш билан бирга муассаса учун кадрлар топиш ишларини ҳам бирваракайига бошлаб юборди.
— Иш ахтариб юрган танишларинг бўлса гаплашавер, фақат ишончли бўлсин, — деди у таниши Гуласалга.
Икковлон ҳали қурилиши режалаштирилаётган муассасада яратилажак 16 та иш ўрнининг «ставка»ларини ўрнатиб олди. Унга кўра олий маълумотли тарбиячилар «бепул», ўрта маълумотли ёрдамчи тарбиячи, ошпаз ва техник ходимларнинг «ставка»си 3 миллиондан 4 миллион сўмгача белгиланди.
Бандлик муаммоси Учқудуққа ҳам долзарб. Туманнинг ўнлаб ёшлари қатори Хуршида ҳам иш ахтараётган эди.
— Сенбоп иш бор, харажатидан қочмасанг бўлди, — деди унга Гуласал. — 4 миллион сўм кетади. Олий маълумотли бўлганингда бошқа гап эди.
Савдо 3 миллион 800 минг сўмга пишиб, пул эртага келтирилишига келишилди. Бироқ Гуллоланинг сабри чидамади.
— Бугун кечқурун келишилган пулни олиб келмасанг, ўрнингга бошқа одам оларкан, — деди шартни Хуршидага етказган Гуласал.
Хуршида ҳуқуқ-тартибот идораларига мурожаат қилди. «Қадрдонлар» ашёвий далиллар билан қўлга олинди.
Уларнинг ҳар иккисига жиноят ишлари бўйича Учқудуқ туман суди ҳукми билан энг кам ойлик иш ҳақининг 40-50 баравари миқдорида жарима жазоси тайинланди.
