2018 йилнинг 15 декабрь куни Ўзбекистон Республикасининг Америка Қўшма Штатларидаги элчиси Жавлон Ваҳобов Туркистон — Америка уюшмаси президенти Абдулла Хўжага “Дўстлик" орденини топширди, деб хабар бермоқда ТИВ.
Ўзбекистон Республикаси президенти Шавкат Мирзиёев жорий йилнинг 11 декабрь куни Абдулла Хўжани миллий қадриятлар ҳамда анъаналарни авайлаш, АҚШдаги ватандошларни жипслаштириш, Ўзбекистон ва Америка халқлари ўртасидаги муносабатларни мустаҳкамлашдаги фидокорона хизматлари учун «Дўстлик» ордени билан тақдирлашга оид фармонни имзолади.
Президент Шавкат Мирзиёевнинг 2017 йил сентябрь ойида Нью-Йоркка ва жорий йилнинг май ойида АҚШга расмий ташрифи чоғида Америкада яшаётган ўзбекистонликлар билан бўлиб ўтган учрашувлари хорижда истиқомат қилаётган ватандошлар билан муносабатларнинг бугунги кунда давлат сиёсатида ўта муҳим аҳамият касб этаётганлигини кўрсатди.
Туркистон — Америка уюшмаси 1958 йили Филадельфия шаҳрида АҚШ ва Канада давлатларидаги Марказий осиёлик муҳожирларни бирлаштирган илк ва тўлақонли уюшмалардан бири сифатида ташкил этилган.
Бугунги кунда Туркистон — Америка уюшмаси аъзоларининг 80 фоизидан кўпроғи АҚШ ва Канадада истиқомат қилаётган ватандошлардир.
Уюшма президенти Абдулла Хўжа АҚШ фуқароси, ота-онаси асли ўзбекистонлик, ХХ аср бошларида Туркистон ўлкасида юз берган сиёсий ўзгаришлар туфайли аввал Афғонистонга, сўнгра АҚШга кўчиб боришган.
