Американинг Нью-Йорк штати, Лог-Айленд оролидаги Саффолк округида яшовчи Майк Кэролл уйининг ертўласидан бедарак йўқолган отасининг суякларини топди, деб ёзмоқда lenta.ru нашри.
ДНК текширувлари бу суяклар унинг отасига тегишли эканлигини тасдиқлади.
Майк Кэролл (Mike Carroll) ва унинг болалари мазкур суякларни 31 октябрь, яъни Хэллоуин байрамида уйидаги ертўладан топган. 12 декабрь куни эса полиция бу жасад қолдиғи унинг отасига тегишли эканлигини маълум қилди. “Бу жуда даҳшатли воқеа, ўзимни қўлга олишга ҳаракат қиляпман”, деди Кэролл.
Эркакнинг отаси - Корея уруши қатнашчиси Жорж Кэролл 1961 йилда, ўғли Майк 8 ойлик бўлганида бедарак йўқолган. Майк бир умр онасидан отасининг бедарак йўқолиш сабабларини сўраган. Бироқ тайинли жавоб ололмаган. Фолбин эса отасини уйдан қидириши лозимлигини, у бошига урилган тўмтоқ жисмдан ҳалок бўлганлигини айтган. 1998 йилда онасининг уйига кўчиб ўтган Майк 20 йил давомида ертўлани кавлаб, жасад қолдиқларини қидирган.
Полиция ҳақиқатан ҳам Майкнинг отаси бошига тўмтоқ жисмдан зарба берилганлигини тасдиқлади. Ўғил отасининг қотилини қидиришдан бош тортди. Жасад топилишининг ўзини “адолат тантанаси” деб қабул қилди.
