Таиландда бундан бир неча кун аввал тоғдаги ғорда йўқолган маҳаллий футбол жамоаси аъзоларини қидириш ишлари кейинги босқичга ўтди, деб хабар берди Вести нашри.
Таиланднинг Чианг Рой тоғида 23 июнь куни 12 нафар ёш футболчилар ҳамда уларнинг мураббийлари ёғингарчилик туфайли ғорга беркинишган ва ғорнинг оғзи сув билан тўлгач, улардан хабар бўлмаган. Шунадан бери давом этаётган қидирув-қутқарув ишлари самара бермагач, жараён кейинги босқичга ўтди. Унга денгиз қутқарув гуруҳи аъзолари ҳам жалб қилинган. Улар сув босган ғорни 10 кмгача қазиб киришни режалаштирилмоқда.
“Биз ғорнинг учинчи туйнугига етиб келдик. Уёғига ўтиш учун сувга шўнғиш керак. Кислородлар эса 200 метргача етиши мумкин. Аммо белгиланган жойга етиб бориш учун бир неча юз метр масофани босиб ўтиш керак. Барча қийинчиликларга қарамай, тўхтамаймиз ва қидирувни давом эттирамиз” деди қутқарувчилардан бири.
Бедарак йўқолган болалар 11 ёшдан 16 ёшгача бўлиб, улар футбол машғулотларидан сўнг Там Луанг ғор комплексини ўрганиш учун келишган. Улар ғор ёнига велосипедларини ташлаб кетишган. Ҳозирда уларнинг ота оналари ва қариндошлари ғорга яқин жойларда ўз яқинларини омон қолишлари учун ибодат қилишмоқда.
