Жорий йилнинг 12 июнида Сингапурда АҚШ ва КХДР етакчиларининг учрашуви бўлиб ўтиши кутилаётган эди. Аммо, Шимолий Кореянинг Жанубий Корея ва Қўшма Штатлар биргаликда ўтказган ҳарбий-ўқув машғулотларни рўкач қилиб, кескин баёнотлар билан чиққани ўтказилажак саммит тақдирига дахл қилди.
Куни кеча АҚШ президенти Дональд Трапм КХДР етакчисига мактуб йўллаб, Сингапурдаги саммитни бекор қилгани, аммо, келгусида Шимолий Корея раҳбари билан учрашишга тайёрлигини маълум қилди. Бугун эса КХДР Ташқи ишлар вазири Ким Ке Гван янги баёнот билан чиққан.
“Рёнхап”нинг ёзишича Пхеньян расмийсининг баёнотида КХДР ҳамон АҚШ билан муносабатларни яхшилаш тарафдори эканлиги, исталган масалани исталган вақтда музокаралар столида ҳал этишга тайёрлиги, таъкидланган. Баёнот хулосасига кўра, Шимолий Кореянинг Корея ярим оролида тинчлик ва барқарорликни таъминлаш борасидаги интилишлари ўзгаришсиз қолади ҳамда АҚШга ўз қарорини қайта кўриб чиқиш учун вақт ва имконият берилади.
Бироқ, Шимолий Кореянинг шу тарзда “юмшагани” натижа берармикан?
РИА Новостининг ёзишича, Оқ уй вакиллари икки давлат ўртасидаги саммитнинг барбод бўлишига КХДР сабабчи, деб билади. Америкалик амалдорларнинг таъкидлашича, саммит олди тайёргарликда ҳам Шимолий кореялик ҳамкасблари қорасини кўрсатмаган. Ваҳоланки улар Сингапурга келиб, музокаралар мазмуни ва тартибини муҳокама қилишда иштирок этиши лозим эди. Яна бир эътироз - Пхунгеридаги ядро полигони йўқ қилинган бўлсада, натижадан Вашингтон расмийларининг кўнгли тўлмайди. Уларнинг фикрича, полигондаги шахталар келгусида асқотиши ҳисобга олингандек, йўлига портлатилган. Пентагон ҳам КХРДга максимал босим ўтказиш позициясида турибди. Америка мудофааси бундан кейин ҳам Жанубий Корея билан ҳарбий-ўқув машғулотлари ўтказишда давом этади.
“Wall Street Journal “ нинг Оқ уйдаги ўз манбасига асосланиб ёзишича, АҚШ Миллий хавфсизлик кенгаши йиғилишида КХДРга янги санкциялар киритиш ва ҳарбий аралашув масалалари муҳокама қилинган.
Демак, Америка ва Шимолий Корея муносабатлари янада кескинлашиши мумкин.
ЎзА
