Биз улар ижро этган қўшиқларни маза қилиб эшитамиз, суратга тушган фильмларини мириқиб томоша қиламиз. Улар ўзлари ижро этган образларидек эзгуликка интиладилар, қўшиқларида тараннум этилган яхшиликни тарғиб этадилар. Марҳамат, “Юлдузлар хиёбони”даги савобталаблар билан танишинг.
1. “Суғур куни”даги Билл Мюррей
Чарлстондаги (АҚШ) The Steel Drivers концертига келганлар бунақасини кутишмагани аниқ: “Суғур куни”, “Жаноб тақдир” каби кинофильмлари орқали мухлисларини қалбидан жой олган актёр Билл Мюррей ҳам концертга тушмоқчи бўлди, лекин концерт бошланишидан олдин кассадан анча-мунча чипталарни сотиб олди-да, навбатда турганларга тарқатиб чиқди.
2. “Соатлар куйчиси” Крис Мартин
Coldplay ҳонандаси Крис Мартин гуруҳнинг концерти бўлиб ўтадиган ҳар бир мамлакатдаги болалар шифохонасига, албатта, ташриф буюради. У болалар билан соатлаб гаплашади, уларга куйлаб беради, совғалар ҳадя этади ва кўнгилларини кўтаради. “Counting Stars”, “Сlocks” каби қўшиқлар куйчисининг бу сингари савоб ишлари ҳақида беморларнинг ижтимоий тармоқлардаги саҳифаларидангина маълум, холос.
3. Қойилмақом Брэд Питт
2005 йили “Катрина” бўронидан Янги Орлеан ҳам қаттиқ талофат кўрди. Юзлаб уйлар вайрон бўлиб, кўплаб оилалар кўчада қолди. уларга мадад қўлини чўзмоқ учун ўша биз билган Ахиллес, Бенжамин Баттон, Сэмюэль, жаноб Смит каби ижролари билан мухлислар меҳрини қозонган Брэд Питт Make It Right фондига асос солди, янги иморатлар қурилиши учун маблағ йиғди, номи кетган архитекторларни чақириб, бинолар лойиҳасини ишлаб чиқишда шахсан қатнашди. Натижада табиий офатларга дош бера оладиган 109 та экологик уй қурилди. Брэд Питт томонидан асос солинган фонд ҳозирда ҳам ўз фаолиятини давом эттириб, кам таъминланган оилаларга уй қуриб бериш учун маблағ йиғиш билан шуғулланмоқда.
4. Хеллбойми ё Рон Перлман?
Кунлардан бир куни асосан иккинчи пландаги роллар ижрочиси актёр Рон Перлман Хеллбойнинг ёш мухлиси билан учрашишга рози бўлади. Лекин маълум бўладики, болакай Рон Перлманни эмас, айнан персонажни кўргиси келган экан. Шунда актёр болакайнинг ҳафсаласи пир қилмай, биргина учрашув учун 4 соат ўтириб, юзига грим тортди.
5. Болалар адабиётининг “жинниси” Питер Джексон
“Хоббит”нинг суратга олиш ишлари вақтида фильм режиссёрининг олдига оммавий саҳнадаги болалар келишди, бироқ бу вақтда жамоа тушлик билан банд экан. Шунга қарамай Питер Жексон болалар билан гурунглашиб, уларга дастхат берди.
6. Қироличанинг севимли қўшиқчиси – Адель
Бир-биридан дилтортар “Someone like you”, “Rolling in the deep”, “I miss you”, “Set fire to the rain”, “You’ll never see me again”, “Water under the bridge”, “Rumour has it”, “River lea…” сингари қўшиқлари ва айниқса, Жеймс Бонд ҳақидаги 22-фильм “Скайфул координаталари” учун куйлаган саундтрэки “Skyfall”ни кўпчилик ҳиргойи қиладиган соҳирнафас Адель 2017 йил июнь ойида Лондондаги Челси ўт ўчириш қисми ходимлари учун сюрприз уюштирди: қўшиқчи қўлида торт билан остонада пайдо бўлди-да, ўт ўчирувчиларга 24 қаватли Гренфелл-тауэр аҳоли яшаш биносида юз берган катта ёнғинни ўчирганлари учун миннатдорлик билдирди. Қолаверса, ўша ёнғиннинг ўзида Адель турмуш ўртоғи билан дарҳол етиб келиб, жабрдийдаларга ўз ёрдамларини таклиф этишган эди.
Адель “Скайфул координаталари”га куйлаган саундтрэки “Skyfall” учун “Энг яхши қўшиқ” номинацияси Оскар мукофотига сазовор бўлган. Энг қизиғи, Адель Буюк Британия қироличасининг севимли қўшиқчисидир.
7. Севги илоҳи Том Хэнкс
“Форрест Гамп”, “Қувғинди”, “Қўлингдан келса, мени тут”, “Сизга мактуб”, “Сиэтллдаги бедорлар”, “Филадельфия”, “Аполлон 19”, “Терминал”, “Жаноб Бэнксни қутқариш”, “Булутли атлас”, “Оддий аскар Райанни қутқариш” сингари бир-биридан ажойибу ғаройиб фильмларда яратган образлари орқали барчага севимли актёр ва режиссёр Том Хэнкс 2017 йилнинг ноябрь ойида Хьюстон (АҚШ) китоб фестивалида севги илоҳи қиёфасида қатнашди: бир йигит севгилисидан қўлини сўраши учун актёр ўз чиқишини тўхтатиб турди. Турган гап, қиз рози бўлди.
8. “Музей”даги Бен Стиллер
2012 йили “Сэнди” бўрони Нью-Йоркка “ҳужум” қилганда, “Музейдаги тун” трилогияси билан дунёга машҳур актёр қўл қовуштириб турмай, жабр кўрганларга озиқ-овқат борасида ёрдам қўлини чўзди.
9. Серқирра Мэттью Макконахи
2017 йил 4 ноябрда “Харидорларнинг Далласдаги клуби”, “Саҳрои Кабир”, “Жонсоннинг озод штати”, “Адвокат учун линкольн”, “Собиқ маъшуқаларнинг арвоҳи” каби фильмлари билан машҳур актёр Мэттью Макконахи 48 ёшга тўлди. У мучал тўйини ўзгача нишонлашга қарор қилди: 250 та кўнгиллилар билан таваллуд куни АҚШда яқинлашиб келаётган байрам – Шукрона куни муносабати билан Лоренсберг аҳолисига 4500 та курка гўшти тарқатиб чиқди.
10. “Толеи кулган” Зак Эфрон
Бир куни “Енгилтак бобо”, “Толеи кулган”, “Чарлининг қўш ҳаёти” фильмлари билан танилган актёр Зак Эфрон томон унинг мухлиси бирга суратга тушиш учун шошиб чопади-ю, смартфони қўлидан тушиб кетиб синади. Шунда актёр бу муаммони оддийгина ҳал этади: ўз мухлисига янги телефон сотиб олиб беради.
Аdme.ru нашри.
