Коньки, хоккей дастаси, бош кийим ва бошқа анжомлар “Бинокор” хоккей клуби ҳамда НUMO муз спорти турларини ривожлантириш марказининг ҳаваскор шуғулланувчиларга янги 2018 йил кириб келишига саноқли соатлар қолганида топширилган Президент совғаси рўйхатидан ўрин олди.
– 2017 қишки спорт турли билан шуғулланувчилар хотирасида узоқ вақт сақланиб қолади. Улар Президент Шавкат Мирзиёев ташаббуси билан қишки спорт турларини ривожлантириш мақсадида НUMO профессионал спорт мажмуаси қурилишини бошланганлигини, барча ҳудудларда муз саройлари барпо этилишига қарор қилинганлигини ҳамда 4 тақишки спорт тури, жумладан хоккей бўйича федерациялар ташкил қилинишини катта қувонч билан кутиб олишди. Ёш хоккейчиларга Президент совғасининг топширилишини ҳам муҳим бошланғич дейиш мумкин. Буларнинг барчаси болажонларни қувонтирса, бизда Ўзбекистонда қишки спорт турларининг келажаги порлоқ эканлигига ишонч уйғотади. Бу ишларнинг барчаси болалар ўртасида хоккейни янада оммалаштиришга хизмат қилади. Биз аллақачон ўз фарзандларини айнан мана шу хоккей билан шуғулланишга беришга қизиқиш билдираётган ота-оналар сони ортиб бораётганлигини сездик, - дейди Ўзбекистон хоккей федерацияси бош котиби Шукрилла Каримов.
– Биз Президент совғасидан беҳад миннатдормиз, - дейди Платон Ведененскийнинг онаси Карина.– Ўғлим 5 ёшидан буён хоккей билан шуғулланади. Бироқ биз бу машғулотни тўхтатишга мажбур бўлаётгандик. Чунки ўғлимнинг бўйи ўсди, янги кийим олишга эса маблағ йўқ. Мана шу совға сабабли биз яна музга қайтамиз ва севимли спорт билан шуғулланишда давом этамиз.
Ўтган йилларда болалар ва ўсмирлар хоккейини ривожлантириш борасида катта ишлар амалга оширилди. Бу борада алоҳида эътибор секцияларга болалар ва ёшларни жалб қилиш қаратилди. Шукрилла Каримов сўзларига кўра, қисқа муддатда бир нечта жамоаларни ташкил қилиш керак. Бу уларнинг ўзаро ўйинларини ташкил қилиш ва тажриба орттиришларига хизмат қилади. Кейинчалик эса халқаро мусобақаларда иштирок этувчи ёшлар терма жамоасини ташкил қилиш режалаштирилмоқда. Ана шундай йўл билан ёш хоккейчилар ўсиб бораверади ва жамоалар пайдо бўлади.
Келажакда мамлакатдаги Олимпия захиралари коллежлари ва олий ўқув юртларида ҳам кадрлар тайёрлаш мўлжалланмоқда. Ҳозирча эса мутахассислар айни пайтда ҳаваскор хоккей билан шуғулланувчилар орасидан тайёрланади. Лекин бу ким хоҳласа мураббий бўла олади дегани эмас, албатта. Номзодлар республикада ўрнатилган тартибда тайёргарлик ва аттестациядан ўтишади. Бу мутахассислар нафақат хоккейни билишлари, балки машғулотлар ҳамда тарбиявий жараёнларни ҳам амалга оширадиганлар бўлиши талаб қилинади.
Ўзбекистон хоккей федерацияси фаолиятини такомиллаштиришда профессиональ хоккей клуби “Бинокор”да ўйнаган ва айни пайтда Россия, Белоруссия ҳамда бошқа мамлакатларда мураббийлик қилаётган мутахассислар яқиндан ёрдам беришади. Федерация вакиллари уларнинг кўплари билан музокаралар олиб боришди. Ўз навбатида улар ҳам Ўзбекистонда хоккейни ривожлантириш жараёнларини қўллаб-қувватлашга тайёрликларини билдиришган. Ҳамкорликда нафақат мураббий ва ҳакамлар тайёрланади, балки тарбияланувчиларнинг хорижда ўқув-машғулот йиғинлари ҳам ташкил қилинади.
Ҳозирча жамоалар шакллантирилмоқда. Мавжуд жамоалар ўртасида турли мусобақалар ўтказилади. 2020 йилга бориб эса 7-16 ёшгача бўлган 5 ёш йўналишидаги жамоалар ўртасида Ўзбекистон чемпионати ўтказилиши режалаштирилмоқда. 2022 йилга бориб эса ёшлар жамоалари ўртасида шундай мусобақаларга старт берилади. Федерация режасига жамоаларнинг халқаро мусобақаларда иштирок этишларини ташкил қилиш киритилган.
