«Дўстинг кимлигини айт, мен сенга кимлигингни айтиб бераман», деган гап топиб айтилган. Атрофингизни пессимистлар қуршаб олганидан кейин сизда кўтаринки кайфият, ўз ишидан мамнуният ҳисси қаердан ҳам бўлсин? Агар турмуш тарзингизни ўзгартирмасангиз, манзилингиз аниқ — депрессия! Кўнгилсиз вазиятнинг ҳам ижобий томонларини кўра билинг. Мавжуд ҳолатдаги хатонгизни тан олиб, уни тўғирланг. Ишонинг, ҳаётингиз фақат қора чизиқлардан иборат эмас! Шунчаки зарбалардан хулоса чиқариб, ўзингизни ўргансангиз бас. Яна бир маслаҳат: қувончли кунларингизни тарихга муҳрлаш учун кундалик тутинг. Тушкунликда унга кўз югуртириб, кимгадир ёрдамингиз текканидан, керакли одамлигингиздан, яқинларингиз қувончига сабабчи бўлганингиздан бошингиз осмонга етади. Қарабсизки, пессимистлик ўз ўрнини оптимистликка бўшатиб беради. Ҳаётдан завқ олинг.
Манба: «SUG‘DIYONA» газетаси.
