"Даракчи" газетасининг меҳмони нафақат овоз ёзиш студиясида, балки ошхонада ҳам ижод қилишни хуш кўрадиган хонанда Улуғбек РАҲМАТУЛЛАЕВ. Хонанда ўзига раво кўрган энг сара нарсаларни атрофдагилар билан ҳам бўлишишни яхши кўради. Шу боис саҳифамиз орқали ўзи севган “Стейк” таомини “Палет” ресторанида тайёрлаб, махсус сирлари билан бўлишди. Улуғбек Раҳматуллаевнинг айтишича, бу таомни пиширишни шу ернинг бош ошпази Сарвар Ғаниевдан ўрганган экан...
Зарур масаллиқлар (4 кишилик учун):
- 1 кг. буқанинг биқин гўшти,
- Таъбга кўра зайтун ёғи, туз, мурч.
Тайёрланиши:
1-жараён:
Гўштни бўлакларга бўлиб, иккила тарафига туз, мурч сепилади ва устидан зайтун ёғи қуйиб, маринат қилинади.
2-жараён:
Яхши қизиган товада маринатланган гўштни иккила томонини қизартириб пишириб олинади. Бу жараёнга 10 дақиқадан 20 дақиқагача вақт кетади. Олов баланд ҳолда бўлиши зарур. Гўштнинг қалинлиги ҳисобига куймайди, бундан ҳавотир олманг.
БАҲОРИЙ САЛАТ
Зарур масаллиқлар:
- 2та бодринг,
- 2та помидор,
- 2та булғор қалампири,
- 1та пиёз,
- Кўкатлар ва зайтун ёғи.
Пиёз ва бодрингни халқа, помидор ҳамда булғор қалампирини узунчоқ шаклда, кўкатлар ўртача катталикда тўғралади. Сабзавотларни таъбга кўра зайтун ёғи билан аралаштириб, таом билан дастурхонга тортиш мумкин.
ЭСЛАТМА!
- Таомда гўштни мазаси бузилмасин, десангиз сигирни эмас, янги сўйилган ёш буқанинг биқин гўштини харид қилинг. Йўқса, гўшт қотиб қолади.
УЛУҒБЕК РАҲМАТУЛЛАЕВДАН ФОЙДАЛИ МАСЛАХАТЛАР
- Сўлиб қолган укроп ва петрушканибироз муддат сирка аралаштилган сувга солсангиз яна асл ҳолига қайтади.
- Қайнатилган сабзавотларингиз мазасини йўқотмаслигини истасангиз, уларни сув қайнаганидан сўнг солинг.
- Яшил рангдаги сабзавотларни усти очиқ идишда қайнатинг. Шунда рангини сақлаб қолади.
- Кесилган қўзиқоринга туз сепиб кўринг, агар сарғайса истеъмолга яроқсиз.
- Кумуш тақинчоқларни жилосини қайтариш учун бир неча дақиқа кетчупга ботириб, сўнг тиш чўткаси билан тозаланг.
- Ҳеч қачон нонуштадан бош тортманг. Бу кун давомидаги тетикликни таъминловчи энг муҳим жараён. Эрталабки овқатни ўтказиб юборадиган эркакларда инфаркт натижасида вафот этиш эҳтимоли 27 фоизни ташкил қиларкан.
- Эрталаб ва кечқурун тиш ювишни унутманг! Стоматологлар тиш шёткасини сақич ё шунчаки оғизни чайишга алмаштириб бўлмаслигини таъкидлашган. Тишни тоза ювишни канда қилмасангиз, стоматологга вақт кетказишдан ҳалос бўласиз.
- Очлик, оғриқ, совуқ, иссиққа чидаб бўлмайди. Бу организмдан берилган дарак. Таом тановул қилиб, чанқоқни қондириб, бу масалани енгил бартараф этиш мумкин. Бироқ қолганларига шифокордан маслахат сўраб, ўз қўлингизда бўлган соғлиқни асрашни унутманг!
- Спорт билан шуғулланинг, бунга 150 дақиқа ажратиш ёш кўринишингизни беш йилга узайтиришга хизмат қилар экан. Тушкунликдан ҳалос бўлинг, шунда кўпгина касалликларнинг олдини олган бўласиз.
Садоқат АЛЛАБЕРГАНОВА тайёрлади. Фотомухбир: Ислом РЎЗИЕВ
